Թուրք պաշտոնաթող գեներալ-մայոր Օսման Փամուքօղլուն «Երրորդ համաշխարհային պատերազմ» վերնագրով գիրք է հրատարակել, որում կարծիք է հայտնել, թե երրորդ աշխարհամարտն անխուսափելի է:
Թուրք զինվորականի համոզմամբ, պատերազմը սկսվելու է ԱՄՆ-ի, Չինաստանի և Ռուսաստանի միջև: Միաժամանակ Փամուքօղլուն ենթադրում է, որ այդ կողմերից երկուսը միավորվելու են ընդդեմ մեկի:
Գեներալի խոսքով, վերահաս երրորդ համաշխարհային պատերազմի հստակ նախանշանները գերտերությունների կողմից սպառազինություններին հատկացվող ահռելի գումարներն են:
Փամուքօղլուի վերլուծությամբ, հաշվի առնելով այն փաստը, որ նախորդ երկու աշխարհամարտերում Ռուսաստանը Մեծ Բրիտանիայի և ԱՄՆ-ի դաշնակիցն էր, ապա վերահաս պատերազմի դեպքում էլ Մոսկվան կրկին կդաշնակցի Միացյալ Նահանգների հետ:
Ավելի վաղ, ՌԴ նախագահ Վլադիմիր Պուտինը, խոսելով երրորդ համաշխարհային պատերազմի հավանականության մասին, նշել էր, որ դա կլինի քաղաքակրթության վերջը:
