Այսօր՝ դեկտեմբերի 24-ին կայացել է Հայաստանում ՌԴ դեսպան Սերգեյ Կոպիրկինի ամփոփիչ մամուլի ասուլիսը: Ի թիվս մի շարք թեմաների, դեսպանն անդրադարձել է նաև Հայաստանում քրեական գործերով անցնող մի խումբ նախկին պաշտոնյաների՝ Ռուսաստանում գտնվելու մասին հարցին:
Լրագրողներից մեկի դիտարկմամբ, գոյություն ունի տեսակետ, ըստ որի՝ Ռուսաստանը որոշակիորեն «խոչընդոտում է Մարտի 1 գործի բացահայտմանը» և պաշտպանում է այդ գործով մեղադրյալ, ՀՀ երկրորդ նախագահ Ռոբերտ Քոչարյանին:
«Ինձ համար դա ոչ թե քաղաքական, այլ իրավական հարց է, և դրան հենց այդ կերպ էլ պետք է վերաբերվել: Երկու երկրներում էլ կան իրավաբանական գործիքներ, կոնվենցիաներ, օրենսդրական նորմեր: Հայաստանի և Ռուսաստանի գլխավոր դատախազության մասնագետները համագործակցում են: Թողնենք այդ հարցը իրենց իրավասության ներքո»,-հայտարարել է Սերգեյ Կոպիրկինը:
Հարցին, թե պաշտպանո՞ւմ է դեսպանը Քոչարյանը, ռուսաստանցի դիվանագետը հայտարարել է, որ ինքը փաստաբան չէ:
