Եգիպտոսի իշխանությունները հայտարարել են ազգային երկաթգծային ճանապարհների հսկայական մի նախագիծ կյանքի կոչելու մտադրության մասին։ Երկրում ամենամեծ պահանջարկ ունեցող տրանսպորտային միջոցի զարգացման վրա շուրջ 11 միլիարդ դոլար է ծախսվելու։
Ինչպես հայտնել է տրանսպորտի նախարար Իբրահիմ ադ-Դամիրին, նախագիծն իրականացվելու է առաջիկա 10 տարվա ընթացքում՝ 2 փուլով։ Նրա խոսքերով՝ առաջին փուլն արդեն մեկնարկել է դեռ 2013 թվականին և տևելու է 5 տարի։ Խոսքը գնում է Կահիրեն Ալեքսանդրիային միացնող, 220 կիլոմետր երկարությամբ երկաթգծերի արդիականացման մասին։ Այդ ընթացքում արդիականացվելու են նաև Կահիրեից հյուսիսային այլ քաղաքներ տանող երկաթգծերը։
Երկրորդ փուլում Եգիպտոսի իշխանությունները մտադիր են 2 նոր արագընթաց երկաթգծային ճանապարհներ կառուցել։ Ծախսերի մի մասը կառավարությունը մտադիր է փակել՝ վաճառքի հանելով շինարարության կազմակերպման համար հատուկ ստեղծվող ընկերության բաժնետոմսերը։
