Դրական դեպքերն ավելի շատ են, քան նախորդ օրը. Նիկոլ Փաշինյան

ՀՀ վարչապետ Նիկոլ Փաշինյանը ֆեյսբուքյան իր ուղիղ եթերի ժամանակ, մասնավորապես, նշել է.

«Սիրելի հայրենակիցներ, գիտեմ, որ երեկվա զարգացումներից հետո, այսօր սպասում եք լուրերի: Մենք այսօր խորհրդակցություն ունեցանք և առողջապահության նախարարությունում, և պարետատանը: Երեկվա մեր դրական դեպքերը 20-ն են. ավելի շատ, քան նախորդ օրը: Իհարկե, թեստերը մի քիչ ավելի քիչ են. թեստերի քանակը 211 է, բայց առողջապահության նախարարությունը և պարետատունը կարծում են, որ երեկվա մեր գնահատականը շարունակվում է պահպանվել և երեկ նաև շատ բացառիկ օր է եղել նրանով, որ առողջացումով դուրս գրված պացիենտները ավելի շատ են եղել, քան նոր ախտորոշումները: 20 հոգի նոր ախտորոշում ունենք և 25 հոգի առողջացումով դուրս գրված պացիենտ ունենք, և սա լավ նորություն է:

Մեր առաջիկա մարտավարությունը հետևյալն է. առողջապահության նախարարությունը պետք է ամեն ինչ անի, որպեսզի առաջիկա շաբաթվա վերջը՝ արդեն օրը 1000 հետազոտության հասնենք: Եվ այդ 1000 հետազոտությունն ավելի ամբողջական պատկերացում կտա մեր իրավիճակի մասին: Կարող եմ արձանագրել, ընդամենը, որ զգում եմ նաև, որ առողջապահական համակարգի լարվածությունը մի փոքր նվազել է՝ նաև այն պատճառով, որ մեր համակարգն ադապտացվել է: Ես կարող եմ ընդամենը մի բան ձեզ տեղեկացնել, որ այսօրվա դրությամբ մենք 1400 մահճակալ ունենք կորոնավիրուսի համար նախատեսված, բայց այս պահի դրությամբ, փաստորեն, այդ մահճակալների միայն կեսն է զբաղված, ինչը նշանակում է, որ մենք շատ լարված չենք և կարող ենք ասել, որ դրան նպաստել է նաև ծանր, առավել ծանր դեպքերի նվազումը. երեկ ես ասացի, որ երկու հոգի, ովքեր գտնվում էին ծանր վիճակում, նրանց մեր բժիշկները կարողացել են կրիտիկական հատվածից դուրս բերել: Եվս մեկ անգամ ուզում եմ շնորհակալություն հայտնել մեր բուժաշխատողներին և ևս մեկ անգամ ուզում եմ հիշեցնել, որ այս վիճակագրությունը մեզ ստիպում է, օգնում է կամ հուշում է, որ հնարավոր է, որ սահմանափակումների մեր քաղաքականությունն արդյունավետ է: Եվ խնդրում եմ՝ այս շաբաթվա ընթացքում առավել խստությամբ, առավել բարեխղճությամբ պահել սահմանափակումները, որպեսզի մենք կարողանանք երկուշաբթի օրվանից սկսենք ռեժիմի թուլացման մասին մարտավարություն որդեգրենք, եթե վիճակագրությունն, իհարկե, նման բանի հնարավորություն տա»: