Դիմակային նորաձևություն. դիզայներն այն համեմատում է պատերազմի ժամանակ փամփուշտ վաճառելու հետ

Կարոնավիրուսային համավարակով պայմանավորված՝ բժշկական դիմակներ կրելը վարքագծի համապարտադիր կանոն է դարձել շատերի համար: Իգական սեռի ներկայացուցիչների մի մասը, հատկապես, ձգտում են դրանք համապատասխանեցնել իրենց հագուկապին ու ոճին: Ուստի նորաձև դիմակների մուտքը համաշխարհային մոդայի ինդուստրիա զարմանալի ու անսպասելի չէր:

Թեմայի շուրջ AraratNews.am-ը զրուցել է դիզայներ-մոդելավորող Արամ Նիկոլյանի հետ:

AraratNews.am-ի թղթակցի հետ զրույցում Արամ Նիկոլյանը մասնավորապես նշեց.

«Գիտեք, առաջարկը, այսպես ասած, պահանջարկ է ծնում, բայց այս պարագայում կան համաշխարհային նորաձևության տներ, որոնք ունեն արդեն պատրաստած դիմակներ: Իմ մետեցումը դրան մի փոքր այլ է, բայց, որպես այդպիսին, չէին կանխատեսում, որ մի օր դիմակը կդառնա պարտադիր հագուստի դետալ: Ես ինքս չէի ցանկանա ու դիմակի ասոցիացիաները, համենայնդեպս, լավ բանի մասին չեն, բայց գլոբալ առումով, քանի որ կա մեծ պահանջարկ, ու մարդիկ, ովքեր որ հետևում են նորաձևությանը, ովքեր ուզում են տարբերվել՝ փորձում են նաև այդ առումով տարբերվել, այդ իսկ պատճառով տարբեր դիզայներական տներ իրենց հին հավաքածուներից տարբեր ֆոտոներ են հրապարակում՝ դիմակներով կամ դիմակ հիշեցնող ինչ-որ բաներով, ու կան նորաձևության տներ, որոնք ստեղծում են նոր դիմակներ ու փորձում են այն կոմերցիոն գործիք դարձնել, քանի որ կա պահանջարկ: Զուտ, կարծում եմ, որ այդքանով կսահմանափակվի»։

AraratNews.am-ի թղթակցի այն հարցին, թե արդյոք հայաստանյան իրականության մեջ համապատասխան մասնագետները նման առաջարկներով հանդես եկել են, դիզայներ-մոդելավորողը պատասխանեց.

«Կան դիզայներներ, որոնք փորձում են տարբերվող դիմակներ ստեղծել: Ես ինքս չեմ անում, քանի որ նշեցի՝ իմ մոտեցումը մի փոքր այլ է. ես դա համեմատում եմ մոտավորապես պատերազմի ժամանակ փամփուշտ ծախելու երևույթի հետ, ինչն ինձ համար անընդունելի է: Բայց կան մարդիկ, որոնք դրանից ունենում են մեծ եկամուտներ, մեծ շահույթներ, ովքեր այդ փոքր աքսեսուարը կարողանում են բավականին բարձր գնով վաճառել: Կարծում եմ, որ դա ցանկացած դիզայների մոտեցման խնդիր է, և ոչ մեկին չեմ քննադատում»:

Արամ Նիկոլյանն ընդգծեց, որ երբեք չի փոխում իր սկզբունքները, ու քանի որ ի սկզբանե նման մոտեցում ունի՝ որևէ շահույթ չի կարող փոփոխել այն:

Օլյա Շահինյան