2013-ը ես համարել էի անորոշության տարի եւ այն կշարունակվի մինչեւ 2014-ի առաջին կիսամյակը: Այսօր այս մասին լրագրողների հետ հանդիպմանը ասաց Հայաստանի գործատուների միության նախագահ Գագիկ Մակարյանը:
«Կուտակային կենսաթոշակների մասով նույնպես մենք սպասողական վիճակում ենք եւ չենք կարող ասել, որ օրենքը բարեհաջող կընդունվի կամ խմորումներ չեն լինի, եթե Սահմանադրական դատարանը, որոշի ընդունել այդ օրենքը»,- ասաց Մակարյանը:
Անդրադառնալով Մաքսային միության հետ բանակցություններին, նա նշեց, որ այդ առումով նույնպես բանակցությունների ծայրը կերեւա տարվա երկրորդ կիսամյակին:
«Դեռեւս պարզ չէ, որ ապրանքներն են թանկանալու, որը էժանանալու: Բացի այդ, այս տարի սպասվում է Ռուսաստանից մի շարք միգրանտների վերադարձը Հայաստան, ովքեր խախտումներ են ձեւակերպած եղել: Այսինքն 400 հազար մարդու ճակատագիր անհայտ է: Դա նշանակում է , որ եթե այդ մարդկանց մի մասը հետ գա, այդ ընտանիքների եկամուտներն են նվազելու, ընդհանուր դժգոհության մակարդակն է բարձրանալու, աղքատության ցուցանիշն է բարձրանալու»,- հավելեց Մակարյանը:
