ՀՀ Դատախազության հայտարարությունը «Դ!եմ եմ» շարժման անդամները բացահայտ շանտաժ են որակում:
Նշենք, որ այսօր ՀՀ Գլխավոր Դատախազությունը կոչ էր արել «Դ!եմ եմ»-ին՝ երթերի ու ցույցերի ժամանակ այլեւս չփակել փողոցը ու չխաթարել երթեւեկությունը, ինչպես մի քանի օր առաջ տեղի էր ունեցել Նալբանդյան փողոցում, այլապես կենթարկվեն քրեական եւ վարչական պատասխանատվության:
«Դ!եմ եմ»-ի անդամ Գեւորգ Գյորգիսյանը ասում է, որ Դատախազությունը փորձում է շատաժի միջոցով մարդկանց վախեցնել:
«Դա ծանոթ գործելաոճ է, կրկնվել են նման դեպքեր: ՀՀ Սահմանադրությունը հստակ ասում է, որ քաղաքացին բռնապետության եւ ապօրինի որոշումների դեմ իրավունք ունի պայքարել քաղաքացիական անհնազանդությունների միջոցով: Սահմանվում է քաղաքացիական անհանզանդությունը երթերի, ցույցերի, փողոց փակելու միջոցով: Այդ ամենը հստակ կա Սահմանադրության մեկնաբանություններում»,- ասում է Գյորգիսյանը Araratnews.am-ին:
Այն հարցին, թե Դատախազության հայտարարությունը ինչ-որ կերպ կարո՞ղ է կաշկանդել «Դ!եմ եմ» -ի անդամներին հետագա ցույցերին մասնակցելու համար, Գյորգիսյանը պատասխանեց.
«Մեր շարժման բոլոր մասնակիցները իրավագիտակցություն ունեն, բոլորն էլ պատրաստ են պայքարել իրենց իրավունքների համար եւ բոլորն էլ գիտեն օրենքը: Մենք շարունակելու ենք պայքարել, դա օրենքի սահմաններում է: Իսկ այն, որ հայտարարության մեջ նշել էին քրեական պատասխանատվության կենթարկեն, դա արդեն իսկ վկայում է, որ բացահայտ շանտաժ է եւ բացահայտ սպառնալիք: Առավելագույնը ինչ կարելի է անել, եթե փակել ես փողոցը ու խանգարել երեթեւեկությանը, դա վարչական տույժի ենթարկելն է: Դա էլ սովորաբար գրում են, բայց դատական կարգով հետ են կանչում, որովհետեւ Սահամանդրությունը բոլոր օրենքներից վեր է կանգնած»,- ասում է Գյորգիսյանը:
