Տարածքային կառավարման ենթակառուցվածքների նախարար Սուրեն Պապիկյանն այսօր կառավարության նիստում առաջարկեց 7 միլիարդ արժողությամբ «Գոլդեն Փելես» հյուրանոցը եւ հողատարածքն ընդունել ՀՀ-ի նվիրատվություն:
Գույքը պետք է լինի Պետական գույքի կառավարման կոմիտեի ենթակայության տակ:
Նախագծով սահմանվում է նաև հյուրանոցի պահպանման համար ոստիկանության հսկողություն ամսական 6 միլիոն դրամ:
ՀՀ ոստիկանության պետի ժամանակավոր պաշտոնակատար Արման Սարգսյանն էլ ասաց, որ կարելի է մտածել գույքի օտարման մասին:
Կառավարության նիստը վարող փոխվարչապետ Տիգրան Ավինյանն էլ կատակով հարցրեց՝ տանկերով ենք պաշտպանելո՞ւ հյուրանոցը: ՀՀ ոստիկանապետի ժամանակավոր պաշտոնակատարն էլ տեղեկացրեց՝ գույքի պաշտպանության ինչ ձեւեր կան:
«Այլ հարցեր: Ոչ մեկի մոտ հարց չի առաջանում, թե էս ինչ գույք է»,- կատակով հարցրեց փոխվարչապետը:
Ֆինանսների նախարար Ատոմ Ջանջուղազյանն էլ ասաց՝ եթե գույքի շահագործումը 2 ամսից կլինի, ապա հարցն այլեւս օրակարգային չի լինի:
Հիշեցնենք՝ 2018 թվականի խորհրդարանական ընտրություններում վարչապետ Նիկոլ Փաշինյանը ասել էր՝ հյուրանոցի սեփականատեր, մաքսային ծառայության նախկին պետ Արմեն Ավետիսյանը ցանկանում է պետությանը նվիրել հյուրանոցը:
