Տեւական ժամանակ` արդեն 4 ամիս, Գյումրու ««Թռչունյան տուն» երեխաների խնամքի տուն»-ը որեւէ ֆինանսական մուտք չի ունեցել: Հունիսից սկսած հաստատության հիմնական հովանավորը, որը տասնամյակներ շարունակ կայուն ֆինանսավորում է իրականացրել, դադարեցրել է գումարի տրամադրումը: Որպես հետեւանք, ի թիվս այլ խնդիրների, հաստատության աշխատակազմն աշխատավարձ չի ստացել:
Խնամքի այս տունը ֆինանսավորվում էր հովանավորի կողմից, իսկ տարածքն ու կառույցը «Թռչունյան տան»-ն անհատույց 2000-ականներից տրամադրել է Մայր Աթոռը:
Գյումրիում ծագած խնդրից տեղյակ է Մայր Աթոռը, նաեւ լուծման ելքեր է որոնում: Բայց այս պահին դրական արդյունքի մասին խոսել չեն կարող: Մայր Աթոռի Սոցիալական ծառայության տնօրեն Տեր Մարկոս քահանա Մանգասարյանը ՀԺ-ի հետ զրույցում ասաց ջանքեր են գործադրում, որպեսզի հնարավոր այլ ֆինանսավորման աղբյուր գտնեն: Այս պահին այդ աշխատանքներով են զբաղված. «Ես չգիտեմ մեր անելիքը որն էր, որ չենք արել: Մայր Աթոռը Վեհափառի մակարդակով ջանքեր է գործադրում, որ ստացվի ֆինանսավորումը: Կառույցը երբեք չի ֆինանսավորվել Մայր Աթռի կողմից, այսինքն ֆինանսավորումը եղել է կոնկրետ դոնորից, որը հունիսից դադարեցրել է ֆինանսավորումը, այդ մասին տեղյակ ենք, նաեւ տեղյակ է կառույցի տնօրենը: Մայր Աթոռն իր մասով տարիներ շարունակ տարածքը եւ մեզ պատկանող շենքն է անհատույց տվել է «Թռչունյան տան»-ը, բայց անշուշտ մեզ համար ցավալի է, որ ֆինանսավորումը չկա այս պահին: Լիահույս ենք, որ շուտով կկարողանանք այդ հարցը լուծենք»:
Ըստ Տեր Մարկոս քահանա Մանգասարյանի, իրենք նոր հովանավոր են փնտրում, քանի որ այն մարդն, ով տասնամյակներ շարունակ ֆինանսավորել էր հաստատությանն ու արդեն մի քանի ամիս որեւէ գումար չի հատկացնում, նրա մասին այլեւս պետք չէ մտածել:
Կառույցի հիմնական ֆինանսական դոնոր համարվող Հերման Հինթիրյանը դեռ նախորդ տարվանից Գյումրիում այլ բարեգործական եւ հովանավորչական գործունեություն է ծավալում: Տեր Մարկոս քահանա Մանգասարյանի համար սա անսպասելի նորություն էր: Ասաց մինչ այս պահը տեղյակ չէր:
