Կառավարությունը որոշում է կայացրել փոխհատուցում տրամադրել ցրտահարության հետևանքով տուժած համայնքներին: Փոխհատուցումը կլինի սերմնացուի և պարարտանյութի տեսքով: Այն, որ միայն ծիրանի բերքի կորստով Արմավիրի և Արարատի մարզի գյուղերը մեծ վնաս են կրել` դա հստակ է: Արարատի մարզի Դվին համայնքի ղեկավար Արծրուն Աբրահամյանը AraratNews.am-ի հետ զրույցում ասաց, որ անցյալ տարի իրենց գյուղը ՌԴ արտահանող գործարարներին մթերել է մոտ 800 տոնա ծիրան, ինչը մոտավորապես համարժեք է 400 հազար ԱՄՆ դոլարի: Նույն մարզի Ջրաշեն գյուղը, որը ոչ մեծ համայնք է, անցյալ տարի մթերել է մոտ 250 հազար ԱՄՆ դոլարին համարժեք ծիրան, այս գյուղի համար ևս ծիրանը հիմնական զբաղմունքն էր և հիմա գյուղացիները հայտնվել են անասելի իրավիճակում և չգիտեն ինչ անել: Ջրաշեն համյանքի գյուղացիներից մեկը մեզ հետ զրույցում ասաց, որ իրենց գյուղում հիմնականում ծիրանի այգիներ են և այլ մշակաբույս տնկել չի լինի.«Ծիրանի այգիներ են հիմնականում մեր գյուղում և հիմա անհնար է ուրիշ բան ցանել էդ այգիներում»,-նկատեց մեր զրուցակիցը: Գյուղացիները ոգևորված չեն կառավարության մտադրությունից և չեն կարծում, որ պետության կողմից տրված փոխհատուցումը որևէ հարց կլուծի.«Մի քանի տարի առաջ նորից նման իրավիճակ էր և պետությունը «օգնեց» գյուղացիներին` ծանր իրավիճակում բերեց և տանձի տնկիներ բաժանեց: Ոչ ոք այդպես էլ չհասկացավ, թե մեր ինչին էին օգնելու տանձի տնկիները»,-ասաց մեր զրուցակիցներից մեկը` ավելացնելով, որ փորձելու են երկրից դուրս գալ, որպեսզի ընտանիքին կարողանան ինչ որ կերպ պահել:
