«Շատ ուրախ եմ, որ այս տարի ես եմ ներկայացնելու Հայաստանը. դա ինձ համար մեծ պատիվ է և պատասխանատվություն, իմ առաջին մասնակցությունն է միջազգային մրցույթի, հուսով եմ`ամեն ինչ լավ կլինի. աշխատել ու աշխատում եմ պրոֆեսիոնալ մարդկանց հետ»,-այսօր լրագրողների հետ հանդիպման ժամանակ նշեց Յուրմալայում կայանալիք «Նոր ալիք 2014» միջազգային մրցույթում Հայաստանը կներկայացնող Սոնա Ռուբենյանը: Ըստ երգչուհու` մցրույթից առաջ և հետո միշտ կարևորվում են մասնակցության տարբեր նախապայմաններ, սակայն մրցույթնի մասնակցում են հաղթելու համար. «Գերնպատակս լինելու է հաղթանակը, չնայած թեժ մրցակցություն է լինելու. կան լավ ձայներ ու ուժեղ մասնակիցներ»,- ասաց Սոնան ու ընդգծեց` կանի ամեն ինչ, որ հաղթանակը մերը լինի:
Անդրեն, որ Սոնա Ռուբենյանի երաժշտական պրոդյուսերն է, խոսելով ընտրված երգերից ու Սոնայի հնարավորություններից փաստեց, որ ընտրվել են իսկապես ուժեղ երգեր. «Շատ—շատ երգեր ենք ձայնագրվել և ուղարկվել, սակայն երգեր չէին ընտրվում, մենք, իհարկե, շարունակում էինք ուղարկել ուժեղ երգեր. նպատակ էր դրված անպայման ներկայացնել ուժեղ երգեր, որոնք հնարավորություն կտան Սոնային լիարժեք ներկայացնելու իր պոտենցիալը»,- ասաց Անդրեն:
«Մցրույթի առաջին օրը ներկայացվելու է միջազգային հիթ` Մայլի Սայրուսի «Wrecking Ball», երկրորդ օրը Սոնան ներկայանալու է Մհեր Մեսրոպյանի հետ դուետով. կերգեն Արմեն Սմբատյանի «Հայաստան» երգը, հեղինակային երգի օրվա համար հատուկ երգեր էր գրվել, ուղարկել ենք շուրջ 5 երգ, սակայն ընտրվեց բոլորիս հայտնի Ազատ Հակոբյանի և Մանե Հակոբյանի «Կարոտ» երգը:
Araratnews.am-ի հետ զրույցում Անդրեն նշեց` մրցույթի հետ կապված իր միակ մտահոգությունն այն է, որ վերջին պահին երգ չփոխեն, չնայած իրենք ամեն փուլի համար 10 երգ ունեն պատրաստած: Իսկ մեր այն հարցին, թե մեկից տասը բալանոց սանդղակով քանիս կգնահատեր Անդրեն Սոնայի հաղթելու հնարավորությունները, վերջինս նշեց` հենց տասը:
Նշենք, որ մրցույթին մասնակցելու են 16 երկիր, իսկ մեր մասնակցին մաղթում ենք միայն հաղթանակ:
Լուսանկարները՝ araratnews.am-ի:
