Աժ քառօրյայի այսօրվա ելույթներից հերթականը ՀՀԿ պատգամավոր Դավիթ Հարությունյանինն էր, ով ներկայացրեց իշխող Հանրապետականի կողմից առաջարկված «Գազային հանձնաժողովի» ստեղծման նպատակը:
«Հանձնաժողովը զբաղվելու է նախ սպառողների շահերի պաշտպանությամբ:Երկրորդ խնդիրը, ինչով զբաղվելու է հանձնաժողովը, դա գազի հարցով կուտակված պարտքն է: Երրորդ հարցը պարտքի ձևավորման օրինականությունն է, այսինքն անհրաժեշտ է ճշտել, թե ինչ ճանապարհներով է կուտակվել այդ պարտքը: Չորրորդ խնդիրը դա ՀայՌուսգազարդից օտարված բաժնեմասի գնահատումն է: Հաջորդ հարցը վերաբերում է բնական գազի այլընտրանքային ներկրմանը՝ ռուսական այլ ներկրողի, այլ երկրից ներկրողի միջոցով:Կարելի է քննարկել նաև ոչ թե միայն Հայաստան մատակարարվող, այլև Հայաստանով այլ երկիր տեղափոխվող գազատարների առկայությունը: Գազի գնի առումով ասեմ, որ մենք Վրաստանի սահմանում գնում ենք կոնկրետ բանաձևումով գին ունեցող գազ, և պետք է ուսումնասիրենք այդ բանաձևումները: Սրանք են այն խնդիրները, որոնց պետք է անդրադարձ կատարի հանձնաժողովը:
Ինչ մնում է աշխատակարգային հարցերին, ապա ըստ մեզ հանձնաժողովի նիստերը պետք է լինեն դռնփակ: Սա քաղաքական առումով շատ զգայուն հարց է, և եթե մեր նպատակը քաղաքական դեբատները չեն, իսկ տվյալ դեպքում մեր խնդիրը սպառողի շահերը պաշտպանելն է, ուրեմն դռնփակության հարցը քննարկելն անիմաստ է:
Հանձնաժողովի կազմը պետք է լինի հավասարակշռված: Իշխանական ու ըննդիմադիր ուժերի մեկական ներկայացուցիչներ կստանձնեն այն կոնկրետ աշխատանքները, որոնց կատարումը ընկած կլինի հանձնաժողովի հիմքում»:
Հավելենք , որ ԱԺ ում «գազային հարցով» հանձնաժողով ստեղծելու ԱԺ ընդդիմադիր քաղաքական ուժերի և ԲՀԿ-ի համատեղ նախագիծը մերժելուց հետո ՀՀԿ-ն ինքն արեց նման հանձնաժողով ստեղծելու առաջարկ:
