Բրիտանացի հանրահայտ հեռուստահաղորդավար Պիրս Մորգանը, որը հայտնի է հայտնիների մասին իր անկեղծ հայտարարություններով, «ամոթալի» պահվածքի համար Մեգան Մարքլին «մինի Քարդաշյան» է անվանել: Այս մասին հաղորդում է բրիտանական «The Sun» տաբլոիդը:
Մորգանը կարծում է, որ իր պահվածքով ու գործելաոճով Մեգան Մարքլը չի կարող համեմատվել իր ամուսին արքայազն Հարիի մոր`արքայադուստր Դիանայի հետ. «Նա Քիմ Քարդաշյանի թագավորական մինի կրկնօրինակումն է`այդ կարգավիճակին բնորոշ բոլոր խայտառակություններով»:
Հաղորդավարը նաև Մեգան Մարքլին և արքայազն Հարրիին մեղադրել է նարցիսիզմի և եսակենտրոնության մեջ, և նրանց տեղափոխումը Կանադա անվանել է «Մեգանին մեծ աստղ դարձնելու փորձ»:
Մորգանը նաև վրդովված է, որ Եղիսաբեթ Երկրորդ թագուհին թույլ է տվել, որ զույգն իրեն պահի «համաշխարհային հանրահայտ մարդկանց» նման՝ օգուտներ քաղելով իրենց թագավորական անցյալից: Նրա կարծիքով, այս ամենը «միապետության ավարտի սկիզբն է»:
Հիշեցնենք, որ Մեծ Բրիտանիայի թագավորական ընտանիքի անդամներ արքայազն Հարրին և նրա կին Մեգան Մարքլը Կանադայում անցկացրած 6-շաբաթյա արձակուրդից վերադառնալուց հետո ցնցող հայտարարություն են արել. նրանք հրաժարվել են թագավորական լիազորություններից և այլևս պաշտոնական միջոցառումներին թագավորական ընտանիքը չեն ներկայացնելու։
