Կառավարությունը ԱԺ է ներկայացրել անշարժ գույքի գնահատման կարգը սահմանելու մասին նախագիծ, որով նախատեսվում է գույքի իրական արժեքը մոտեցնել շուկայականին ու նոր չափորոշիչների հիման վրա իրականացնել գույքի հարկումը։
«Նպատակ ունենք պարզեցնել հարկման ընթացակարգերը. երկու տարբեր կոմպոնենտր՝ հող և գույք, պատրաստվում ենք միացնել և որպես մեկ ամբողջական անշարժ գույքի մասով հարկում իրականացնել»,- այս մասին նախագիծը ներկայացնելիս ասաց անշարժ գույքի կադաստրի պետական կոմիտեի նախագահ Սարհատ Պետրոսյանը։
Պետրոսյանի խոսքով՝ նախագծով կվերացվի այսօր գոյություն ունեցող կադաստրային արժեքի ու իրական կյանքում եղած հսկայական ու անընդունելի տարբերությունը։
Բացի այդ, նոր քաղաքականության արդյունքում արդեն մեծ քանակի գույքահարկ կսկսեն վճարել Երևանում հսկայական առանձնատներ ունեցող հիմնականում նախկին պաշտոնյաները։
«Բարձրարժեք գույքերի հետ կապված հարկերի ավելացում է նախատեսվում։ Էականորեն բարձրանալու է հատկապես բարձրարժեք գույքերի հարկումը ու կադաստրային գնահատումը։ Սա նպաստելու է նաև պարապուրդում գտնվող արտադրական և ոչ միայն արտադրական գույքերի շրջանառությանը, որովհետև մենք գիտենք, որ հսկայական քանակությամբ գույքեր կան, որ չեն շրջանառվում ու տնտեսական արդյունք չեն ապահովում»,- նշեց Պետրոսյանը։
