Արդյոք գույքահարկը կբարձրանա. պարզաբանում են կադաստրի կոմիտեից

Օրեր առաջ Ազգային ժողովն առաջին ընթերցմամբ ընդունեց «Անշարժ գույքի հարկման նպատակով շուկայական գնահատման կարգը սահմանելու մասին» օրենքում փոփոխություն անելու Կառավարության նախագիծը, որից հետո ենթադրություն եղավ, թե գույքահարկը  կբարձրանա:

Araratnews.am-ը նախագծի մասին զրուցեց կադաստրի կոմիտեի ղեկավարի տեղակալ Արայիկ Սահակյանի հետ: Պաշտոնյան փարատեց քաղաքացիների մտահոգությունը՝ այս օրինագիծը գույքահարկի բարձրացմանը չի առնչվում: «Մենք ընդամենը սահմանում ենք անշարժ գույքի կադաստրային արժեքը: Օրինագծի ընդունումից հետո կլինի դրույքաչափի փոփոխություն, որից հետո պարզ կլինի՝ որքան կլինի գույքահարկը: Ակնկալում ենք, որ գույքահարկի համատարած բարձրացում չի լինի»,- ասաց կոմիտեի ղեկավարի տեղակալը:

Արայիկ Սահակյանը հիշեցրեց՝ ունենք կադաստրային արժեքներ, որոնք շուկայականից բավական ցածր են, քանի որ դրանց հաշվարկման կարգը, մեթոդաբանությունը հաստատվել են 1994 եւ 2002 թթ.: «Մենք էլի տեղ ունենք բարձրանալու՝ կադաստրային արժեքը շուկայականին հավասարեցնելու, բայց չենք անում, որպեսզի չլինի այնպիսի գույք, որի կադաստրային արժեքը շուկայականից բարձր լինի»,- մանրամասնեց մեր զրուցակիցը:

Ի՞նչ հաճախականությամբ պետք է վերանայել անշարժ գույքի կադաստրային արժեքը:  Արայիկ Սահակյանի  տեղեկացմամբ՝ կադաստրի կոմիտեն պարզեցրել է մեթոդաբանությունը: «Նախկինում  8 տիպի կարգ կար: Հիմա կարգերը երկուսն են: Բացի այդ, սահմանել ենք բազային արժեքներ՝ 1 քմ հողի համար՝ 330.000 դրամ, շինության համար՝ 700.000 դրամ: Ընդ որում, վերջինն ամենաբարձր արժեքն է, օրինակ՝ քաղաքի փոքր կենտրոնում էլիտար շենքի համար»,- պարզաբանեց կոմիտեի ղեկավարի տեղակալը:

Կադաստրի կոմիտեի ղեկավարի տեղակալի խոսքով՝ նախագիծը երկրորդ եւ երրորդ ընթերցմամբ ընդունվելուց հետո 2021 թ. հունվարի 1-ին կմտնի ուժի մեջ: «Մինչ այդ ֆինանսների նախարարության կողմից կմշակվեն գույքահարկի նոր դրույքաչափեր: Օրինակ՝ հիմա չհարկվող գույքահարկի շեմը մինչեւ 3 մլն դրամ է: Մենք այդ շեմը բարձրացնելու ենք, որպեսզի այն գույքը, որը նախկինում էլ չէր հարկվում, էլի չհարկվի: Կամ՝ եթե հարկը քիչ էին վճարում, դարձյալ քիչ վճարեն»,- շեշտեց Արայիկ Սահակյանը:

Կադաստրի կոմիտեի ղեկավարի տեղակալը վստահեցրեց՝ միջին խավի համար այս օրինագիծը բեռ չի լինի: «Բարձրարժեք գույքի համար սա կլինի բեռ այնքան, որ նրանք կվճարեն գույքի կադաստրային արժեքին համապատասխան հարկ: Գույքահարկի ծանրությունը պետք է լինի շքեղ առանձնատների եւ արտադրական այն գույքերի համար, որոնք ժամանակին կոպեկներով սեփականաշնորհել են եւ չեն օգտագործում: Գույքահարկի ծանրությունը խթան կլինի չօգտագործվող գույքի սեփականատերերի համար, որպեսզի կամ  վաճառեն, կամ վարձով տան եւ երկրին օգուտ տան»,- ասաց Արայիկ Սահակյանը:

Իսկ հնարավո՞ր է շքեղ առանձնատան, արտադրական չօգտագործվող գույքի սեփականատերերը կարողանան խուսափել հարկը վճարելուց: Արայիկ Սահակյանը բացասական պատասխանեց՝ օրենքի ներկա եւ փոփոխված տարբերակները դրա հնարավորությունը չեն տալիս: Այլ հարց է, որ քաղաքական ինչ-ինչ կապերով մինչև թավշյա հեղափոխությունը կարողացել են շքեղ առանձնատան սեփականատերերը քիչ վճարել գույքահարկը: «Օրենքը բոլորի համար հավասար պետք է լինի»,- ավարտեց իր խոսքը կադաստրի կոմիտեի ղեկավար Արայիկ Սահակյանը:

Հիշեցնենք՝ ԱԺ ընդդիմադիր խմբակցությունը՝ «Լուսավոր Հայաստանը», դեմ է այս օրինագծին, քանի որ, ըստ նրա, գույքահարկի չափը խորհրդարանը պետք է որոշի, ոչ թե Կառավարությունը:

Սոնա Դավթյան