AraratNews.am-ը արդեն իսկ տեղեկացրել էր, որ մարտի 30-ին և 31-ին Արարատյան դաշտավայրում սպասվում է 0-ից 5 աստիճան ցածր ջեմաստիճան: Մասնագետները պնդում են, որ նման ցրտահարության դեպքում հատկապես պտղատու այգիները մեծ վնասներ կկրեն, որոնցից խուսափելն անհնարին կլինի, սակայն կան միջոցներ, որոնք գործադրելու դեպքում հնարավոր կլինի նվազեցնել վնասները:
Օրերս գյուղատնտեսության նախարարությունը իր տարածած հաղորդագրության մեջ խորհուրդ էր տվել ջրել այգիները, որպեսզի սպասվելիք վնասը նվազեցվի: Ինչպես AraratNews.am-ին տեղեկացնում են Արարատի մարզի մի շարք գյուղերի (Դիտակ, Ջրաշեն, Արևշատ, Աբովյան և այլն) բնակիչները՝ իրենց գյուղերում դեռևս ոռոգման ջուր չկա և չեն կարող հետևել նախարարության խորհրդին:
Գյուղնախարարության հետ մեզ չհաջողվեց կապ հաստատելˋ երեկ մեր զանգերին պատասխանող չկար, իսկ այսօր արդեն աշխատանքային օր չէ: Արարատի մարզի 2 տասնյակից ավել գյուղերում այսօրվա դրությամբ դեռևս ոռոգման ջուր չկա: Ի դեպ տվյալ գյուղերին սպասարկում է «Ազատ» ՋՕԸ, որի մասին ևս տեղեկություններ ճշտել չստացվեց:
