ՀՀ կրթության, գիտության, մշակույթի և սպորտի ոլորտների հարգելի ներկայացուցիչներ,
Շնորհավորում եմ Ձեզ Ամանորի և Սուրբ Ծննդյան տոների կապակցությամբ:
Անցնող տարին նշանակալի էր կրթության, գիտության, մշակույթի և սպորտի ոլորտների համար: 2019 թվականին իրականացվեց պետական կառավարման համակարգի շրջադարձային փոփոխություն՝ միավորվեցին ՀՀ կրթության և գիտության, մշակույթի, սպորտի և երիտասարդության հարցերի նախարարությունները: Այս միավորումը պարտավորեցնող է յուրաքանչյուրիս համար: Այն պահանջում է աշխատանքին մոտենալ ավելի մեծ պատասխանատվությամբ, լինել առավել զգոն, բարեխիղճ և հետևողական՝ ի շահ նոր Հայաստանի պետական ինստիտուտների կայացման:
Երկիրը նորովի կառուցելու, ժողովրդավարական նոր արժեհամակարգ ձևավորելու գործում Կրթության, գիտության, մշակույթի և սպորտի նախարարության դերն անչափ կարևոր է: Մեր ամենօրյա նպատակաուղղված աշխատանքի արդյունքում է ձևավորվելու մտածող, վերլուծող, մասնագիտական բարձր կարողություններով օժտված ապագա քաղաքացին, որն ապահովելու է ազգային ինքնության և առողջ դատողության վրա հիմնված հանրային մշակույթ։
Համոզված եմ, որ 2020 թվականը բոլորիս ջանքերով կլինի շրջադարձային տարի: Համախմբված և բարեխիղճ աշխատանքով կկարողանանք լուծել ոլորտի հանգուցային խնդիրները, հաջողությամբ կիրականացնենք բարեփոխումների լայնածավալ ծրագրերը, որոնց մեկնարկն արդեն տրված է:
Հաջողության հասնելու գրավականը բոլորիս քաղաքացիական բարձր գիտակցությունն է: Լինենք լավատես, հաստատակամ՝ հանուն մեր պետության առաջընթացի, մեր ընտանիքների և քաղաքացիների բարօրության:
