Այսօր «Դուրս մեր գրպանից» նախաձեռնությունը մամուլի ասուլիս էր անցկացնում ՀՀ կառավարության շենքի դիմաց: Նրանք կրկին պահանջում են վերանայել ՀՀ օրենքը իրավախախտ վարորդների համար:
Նախաձեռնության անդամները գտնում են, որ արագաչափ տեսախցիկների արձանագրած խախտումներն ու ըստ դրանց հարուցված տուգանքները հարիր չեն իրենց գրպանին:
Տաքսու վարորդ Արսեն Հակոբյանն ասում է, որ իր կողքին 70-80 տաքսու վարորդ է կանգնած, ովքեր նույն խնդիրն ունեն:
«Քաղաքում հատուկ տաքսիների համար նախատեսված կայանատեղիներ չկան: Եթե վարորդը չի կարողանում կայանի, ուղևորին իջեցնի, բնականաբար, երկրորդ շարք պիտի կանգնի, երկրորդ շարք կանգնեց, տեսախցիկը ֆիքսում է ու տուգանում մինիմում 5000 դրամ: Դրան գումարած, ոչ մի լուսացույց, ոչ մի խաչմերուկ չկա նորմալ կարգավորված»,- ասում է նա:
Արագաչափ տեսախցիկների տեղադրման պահից սկսած վարորդը տուգանվել է 835. 000 դրամով:
«Ինչը կարողացել՝ վճարել եմ, ինչն էլ չէ, մնացել ա: ԴԱՀԿ-ից ինձ նույնիսկ եկել է «կարմիր գծի» համար 100 դրամ չվճարելու համար 10000 դրամ տուգանք»,- Araratnews.am-ի հետ զրույցում ասաց Արսեն Հակոբյանը:
«Դուրս մեր գրպանից» նախաձեռնության անդամները տեղեկացրին նաև, որ պատրաստվում են վաղը անհնազանդության ակցիա կազմակերպել: Ավտոերթը կսկսվի Արշակունյաց պողոտայից, Կոմիտասի անվան պանթեոնի մոտից՝ ժամը 12:30-ին:
