Աֆրիկան կարող է զրկվել փղերի մոտավորապես 20 տոկոսից առաջիկա տասը տարիների ընթացքում, եթե որսագողության աստիճանը կտրուկ չիջեցվի: Նման կարծիք են հայտնել կենդանիների պաշտպանության CITES, TRAFFIC և IUCN ընկերությունները:
Փորձագետների կարծիքով` անցած տարի այդ մայրցամաքում սպանվել է 22 հազար փիղ, ինչն աննախադեպ է նույնիսկ աֆրիկյան մայրցամաքի համար: «Եթե որսագողությունը շարունակի նույնքան ակտիվ մնալ, ինչպես հիմա է, ապա հավանական է, որ առաջիկա տասը տարում Աֆրիկան կկորցնի փղերի հինգերորդ մասը», — ասվում է կազմակերպությունների համատեղ հայտարարության մեջ:
Այս պահին Աֆրիկայում, մոտավոր հաշվարկներով, կա կես միլիոն փիղ: Համեմատության համար նշենք, որ 1980-ականներին այդ թիվը կազմում էր 1,2 միլիոն, իսկ 1900-ին Աֆրիկայում եղել է 10 միլիոն փիղ: Մասնագետներն այս կենդանու նկատմամբ հետաքրքրությունը բացատրում են աղքատությամբ, ինչպես նաև փղոսկրի նկատմամբ մեծ հետաքրքրությամբ:
