Աշխարհի 300 ամենահարուստ մարդկանց կարողությունն անցած տարում ավելացել է 524 մլրդ դոլարով՝ կազմելով 3.7 տրլն դոլար։ Այս մասին հաղորդում է Bloomberg գործակալությունը։
Այս ընթացքում ամենաեկամտաբեր ոլորտը եղել է տեխնոլոգիականը։ Ցուցակի 300 միլիարդատերերից միայն 70-ն են կորուստներ ունեցել։ Այս պահին ամենահարուստ մարդը Բիլ Գեյթսն է, ում կարողությունն աճել է 15.8 մլրդ դոլարով՝ կազմելով 78.5 մլրդ։ Դրան նպաստել է այն հանգամանքը, որ անցած տարի Microsoft-ի բաժնետոմսերի գինն աճել է 30 տոկոսով։ Երկրորդ տեղում մեքսիկացի Կարլոս Սլիմն է, ով անցած տարի կորցրել է 1.4 մլրդ, եւ նրա կարողությունը գնահատվում է 73 մլրդ դոլար։ Երրորդն իսպանացի Ամանսիո Օրտեգան է։ Առևտրային Inditex ընկերության սեփականատերն անցած տարի վաստակել է 9 մլրդ դոլար՝ իր կարողությունը հասցնելով 66 մլրդ դոլարի։
