Մեզ համար ոչ մի բան ինքնանպատակ չէˋ ոչ քառյակը, ոչ կառավարությունը, ոչ վարչապետի անձը, ոչ էլ կառավարության կազմը: Մեր համար նպատակ է՝ երկիրը այս ծանր վիճակից հանելը: Այսօր Ազգային Ժողովում լրագրողների հետ հանդիպմանը այս մասին ասաց ՀՅԴ խմբակցության ղեկավար Արմեն Ռուստամյանը:
«Արյունահոսում է երկիրը այս արտագաղթի տեմպերով, պետք է սա կանգնեցնել: Սա է խնդիրը, եթե բոլորն այս ընկալումով մոտենան, կգտնենք համատեղ միջոցներ այդ նպատակին հասնելու համար: Ժողովուրդը սպասելու է՝ վաղը ինչ-որ բան իր կյանքում փոխվելու է, թե ոչ: Եթե չի փոխվելու, հայհոյելու է ու նորից թողնի հեռանա»,-ասում է Ռուստամյանը:
Անդրադառնալով Սահմանադրության պահանջին համապատասխան հանդիպմանը ՀՅԴ-ի եւ ՀՀ նախագահ Սերժ Սարգսյանի միջեւ, Ռուստամյանը նշեց, որ 2013-ին նույնպես եղել է հանդիպում:
«2013-ին իրենք (մյուս ոչ իշխանական ուժերը) ինչ-որ պատճառաբանություններով չգնացին: Ես ինքս գնացել եմ անձամբ, նախագահին ներկայացրել եմ նույն մոտեցումը, եղել է ամբողջական 7 կետերի մոտեցումը: Այն ժամանակ նախագահը չընդունեց: Հիմա ինչ-որ բաներ փոխվել են, ճանապարհ է բռնում մեր ճշմարտությունը: Ուրիշ ավելի լավ լուծում, առաջարկ չեմ տեսնում ես այսօր: Եթե ավելի լավ, ավելի գեղեցիկ, ավելի տրամաբանված ծրագիր իրենք կասեն, կգնանք այդ ծրագիրը կիրականացնենք»,-ասաց Ռուստամյանը:
Լրագրողների այն հարցին, թե ի՞նչ է փոխվել, Ռուստամյանը պատասխանեց.
«Իրավիճակ է փոխվել, վարչապետ են փոխում: Դա փոփոխություն չէ՞»:
