Այսօր ՀՀ վարչապետ Տիգրան Սարգսյանի հետ ԶԼՄ-ների գալա-ասուլիսին Aararat Media Group-ի ղեկավար Ալեն Սիմոնյանը հարց հնչեցրեց, թե ինչպիսի գնահատական կտա վարչապետը դեկտեմբերի 23-ին Ազգային Ժողովում պատգամավորների եւ երեկ Երեւանի տնտեսագիտական համալսարանում լրագրողների նկատմամբ վերաբերմունքին:
«Ազգային Ժողովում համապատասխան հանձնաժողով կա, Էթիկայի հանձնաժողովը, որը պետք է զբաղվի այդպիսի դրսեւորումներով: Կարծում եմ այնքան էլ պատշաճ չէ վարչապետի կողմից գնահատական տալ, թե ինչպիսին էր պատգամավորների կեցվածքը: Պահվածքի մասին հենց քննարկման տեղը Ազգային Ժողովն է»,- պատասխանեց վարչապետը:
Այն հարցին, թե ինչպես կգնահատի գազային պայմանգրերի քվեարկությունը եւ հրապարակված արդյունքները, որոնք անվավեր են ճանաչվել ոչ իշխանական 4 խմաբկցությունների կողմից, վարչապետը պատասխանեց, որ ոչինչ գաղտնի չի պահվել:
«Քանի հոգի էին մասնակցում քվեարկությանը եւ քանիսն է քվեարկել, կարծում եմ գաղտնիք չկա, այնտեղ կային լրագրողներ եւ ամեն ինչ ձայնագրվում էր, ոչինչ գաղտնի չի եղել մեր քաղաքացիների համար»,- ասաց Տիգրան Սարգսյանը:
