ԱՄՆ պետքարտուղար Ջոն Քերին խոստովանել է, որ ամերիկյան հատուկ ծառայությունները, որոնք զբաղվում են հետախուզական տեղեկությունների հավաքագրմամբ, հեռուն են գնացել։ Այս մասին տեղեկացնում է BBC-ն։
Պետքարտուղարը խոստացել է, որ Բարաք Օբամայի հետ միասին ամեն ինչ կանի, որպեսզի ԱՄՆ ազգային անվտանգության գործակալության կողմից անհարիր գործողություններն այլևս չկրկնվեն։ Միաժամանակ նա շեշտել է, որ հետախուզական գործունեությունը պետք է ուժեղացվի, քանի որ հատուկ ծառայութոյւնների ստացած տեղեկությունները թույլ են տվել կանխել ինքնաթիռների, տների բազմաթիվ պայթյուններ, մարդկանց սպանություններ։
Հիշեցնենք, որ օտարերկրյա քաղաքացիների պետությունների ղեկավարների անօրինական գաղտնալսումների մասին հայտնի է դարձել նախկին գործակալ Էդվարդ Սնոուդենի կողմից գաղտնազերծված փաստաթղթերից, ինչը հարուցել է միջազգային դիվանագիտական սկանդալ։
