Արդեն տեղեկացրել ենք, որ սեպտեմբերի 19-ից էկրան է բարձրանալու ամերիկաբնակ ռեժիսոր Գոռ Կիրակոսյանի («Մեծ պատմություն փոքր քաղաքում», «Կորած-մոլորվածը Հայաստանում», «Քայլ ձիով») «Ազնիվ գողեր» ֆիլմը: Գլխավոր դերակատարներից մեկը հաղորդավարուհի, դերասանուհի Մեգի Գրիգորյանն է, ով մանրամասներ է ներկայացրել իր մարմնավորած կերպարի, ներկայիս զբաղվածության և ԱՄՆ-ից Հայաստան վերադառնալու մեծ ցանկության մասին և ոչ միայն:
— Մեգի, երբ ուսումնասիրում էի ձեր հարցազրույցները՝ հասկացա, որ բավական ռիսկային եք և անընդհատ նոր բացահայտումներ եք սիրում անել: Նախկինում նշում էիք, որ երբ նոր էիք սերիալներում նկարահանվելու առաջարկ ստացել, այդ ամենը ձեզ սարսափեցրել էր: Արդյո՞ք այս անգամ էլ էիք այդչափ «սարսափած», երբ Գոռ Կիրակոսյանի կողմից «Ազնիվ գողեր»-ում նկարահանվելու առաջարկ ստացաք:
-Միշտ էլ սիրել եմ փորձարկումներ անել տարբեր բնագավառներում, դրանք շատ են եղել իմ կյանքում: Հավատացեք՝ որքան էլ տարօրինակ է հնչում, բայց հիմա եմ հասկանում, որ սերիալներում նկարահանվելը ևս մեծ դպրոց է դերասանական կրթություն չունեցողի համար: Սերիալն ավարտելուց հետո կամ ավարտում ես այդ դպրոցը, կամ ոչ, այսինքն՝ կամ քեզ նկատում են և հանդես գալիս տարբեր առաջարկներով, կամ էլ սերիալային կարիերադ ակնթարթային կյանք է ունենում: Անշուշտ զարմանքս և հուզմունքս շատ էր, երբ ստացա արդեն ֆիլմում հանդես գալու առաջարկը, բայց անկեղծ կլինեմ ու կասեմ, որ «սարսափած» չէի այլևս:
—Սա ձեր և Գոռ Կիրակոսյանի առաջին համագործակցությունը չէ, ըստ ձեզ՝ ինչո՞ւ է հենց ձեզ վստահել:
-Մոտ 3 տարի Միացյալ Նահանգներում աշխատելով «Դեմք շոու»-ի հետ՝ կարծում եմ, որ հասցրել եմ ցույց տալ ռեժիսորին իմ դերասանական կարողությունները: Գուցե հենց դա է եղել պատճառը, որ այս ծանր աշխատանքն ու պատասխանատվությունը որոշեց վստահել ինձ, բայց կարծում եմ, որ այս հարցին ավելի լավ և ճշգրիտ կպատասխանի հենց ռեժիսորը:
—Ո՞վ է ձեր մարմնավորած կերպարը, ինչպիսի՞ն էր մթնոլորտը կադրից դուրս: Ի՞նչն էր հատկապես բարդ տրվում:
-Կերպարի մասին խոսելիս առաջին արտահայտությունը, որ ծնվում է ինձ մոտ, հետևյալն է ՝ «իմ հակապատկերը»: Սա, երևի թե, իմ ամենաշատ ադրենալին պարունակող դերն էր: Այնքան հետաքրքիր և էքստրեմալ է կերտել մի մարդու կերպար, ով ոչ մի կերպ կապված չէ քո տեսակի հետ: Նման տեսակի աղջիկները ( խոսքը «տղամարդ աղջիկների» մասին է) միշտ անհասկանալի են եղել ինձ համար, քանի որ աղջիկ կամ կին ասելով՝ պատկերացնում ես կանացի, նուրբ, փխրուն մի էակի ու ինքդ էլ կյանքում համապատասխանում ես այդ տեսակին: Կերպարս տեսակով համարձակ է և անվախ: Շատ փակագծեր չեմ ցանկանում բացել, որպեսզի հանդիսատեսն ինքը վերլուծություններ անի: Պետք է ասեմ, որ նախագծում հավաքված էին իրենց գործում լավագույն մասնագետները, որի համար շնորհակալություն եմ հայտնում: Կարծում եմ՝ յուրաքանչյուր դերասանի համար շատ կարևոր է թե՛ մասնագիտական, թե՛ մարդկային բարձր որակներ պարունակող մթնոլորտը: Հիացած եմ բոլորի աշխատանքով և բոլորին շնորհակալություն եմ հայտնում դրական մթնոլորտի համար: Գուցե ծիծաղելի թվա, բայց ամենաբարդն ինձ տրվեց երկար մազերից հրաժարվելը և երկու ամիս այդ վառ սանրվածքով Հայաստանում ապրելը (ժպտում է):
—Մեգի, ինչ եք կարծում «Ազնիվ գողերը» ձեզ նոր ճանաչում կբերի՞ Հայաստանում:
-Ուղիղ 15 տարի է, ինչ ես աշխատում եմ տեսախցիկի առաջ թե՛ որպես հաղորդավարուհի, թե՛ որպես դերասանուհի: Չգիտեմ կհավատաք, թե ոչ, բայց այս տարիների ընթացքում երբեք չեմ մտածել հայտնի դառնալու մասին: Ինձ պարզապես դուր է եկել աշխատել այս ասպարեզում, և այն միշտ եղել է իմ հակադեպրեսանտը: «Ազնիվ գողեր» ֆիլմը շատ յուրահատուկ է թե՛ իր ոճով, թե՛ նկարահանման ձևով: Վստահ եմ, որ այն շատ կսիրվի և կրկնակի ճանաչում և հաջողություն կբերի ֆիլմի բոլոր դերասաններին:
—Այս պահին ի՞նչ զբաղվածություն ունեք: Տեղյակ եմ, որ կար շրջան, երբ խնդիրներ ունեցող երեխաների հետ էիք աշխատում, սակայն այդ տարիները որակել էիք որպես դաժան տարիներ: Առհասարակ, կարծես թե, սիրում եք տարբեր ոլորտներում ձեզ փորձարկել:
-Ինչպես արդեն նշեցի՝ հեռուստատեսային աշխարհն ինձ համար եղել է հակադեպրեսանտ կյանքի տարբեր փուլերում: Այսօր այլևս դրա կարիքը չունեմ, քանի որ գտել եմ իմ խաղաղությունն ու ազատվել եմ բոլոր տեսակի սթրեսներից: Տարիքի հետ նաև նախասիրություններն են փոխվել, այսօր արդեն զբաղվում եմ բոլորովին այլ աշխատանքով, որը կապված է ԱՄՆ-ում քրեդիտային համակարգի հետ, ինչն էլ ապագայի համար շատ ավելի հաստատուն և շահութաբեր է:
— Հայաստանյան պրեմիերային նախատեսո՞ւմ եք մասնակցել:
-Ցավոք սրտի, աշխատանքի բերումով չեմ կարողանա ներկա գտնվել պրեմիերային:
—Արդեն 10-ը տարի է, ինչ ապրում եք ԱՄՆ—ում: Դուք ինքներդ ձեր մասին խոսում եք որպես մի մարդու, ում կյանքը պարբերաբար անցնում է ինքնաթիռներում, սակայն ԱՄՆ—ն, կարծես թե, վերջին կայարանն է դարձել: «Ազնիվ գողերի» հավանական հաջողությունից հետո դիտարկո՞ւմ եք Հայաստան տեղափոխվելը:
-Հայաստան տեղափոխվելու մասին շատ հաճախ եմ մտածում: Հոգուս խորքում վստահ եմ, որ մի օր վերադառնալու եմ, բայց դա կապ չունի որևէ հաջողության հետ: Սրտիս խորքում թաքնված ցանկություն է, որի հիմքում ապագա երեխաներիս Հայաստանում մեծացնելն է:
