Վերջին շրջանում «Ալ-Կաիդան» ավելի ու ավելի մեծ տարածքներում է հաստատում իր վերահսկողությունը։ Այս ծայրահեղական կազմակերպության մերձավորարևելյան մասնաճյուղը՝ «Իրաքում և Լևանտում իսլամական պետություն» խմբավորումը վերահսկում է Հալեպից դեպի արևելք ընկած զգալի տարածքներ, ինչպես նաև վերջին օրերին վերահսկողություն է հաստատել Իրաքի արևմտյան մի քանի շրջաններում։
CNN-ի ազգային անվտանգության հարցերով վերլուծաբան Փիթեր Բերգերը նշում է, որ «Ալ-Կաիդան» իր պատմության ընթացքում առաջին անգամ է վերահսկողություն հաստատում այսքան մեծ՝ 400 մղոն երկարություն ունեցող տարածքի վրա։ Այս վերլուծությունը նա արել է՝ հետևելով արաբական և անգլալեզու մի շարք աղբյուրների տարածած տեղեկություններին։
Բերգերը հիշեցրել է, որ 2001 թվականին Այման Ալ-Զավահիրին, ով «Ալ-Կաիդայի» առաջնորդներից է, իր ինքնակենսագրականում նշել էր, որ «Ալ-Կաիդայի» նպատակն է արաբական աշխարհում ստեղծել մի պետություն, որը նման կլինի թալիբների կողմից Աֆղանստանում ստեղծված պետությանը։ «Առանց այս նպատակի իրագործմանը մեր հիմնական նպատակներն արժեք չեն ունենա», — ասել էր Զավահիրին։
