Ազգային ժողովում այսօր անցկացվում է Հավաքական անվտանգության պայմանագրի կազմակերպության խորհրդարանական վեհաժողովի (ՀԱՊԿ ԽՎ) պաշտպանության և անվտանգության հարցերով մշտական հանձնաժողովի փակ նիստը, որի աշխատանքային լեզուն ռուսերենն է: Նիստում ընդդիմադիր պատգամավոր Խաչատուր Քոքոբելյանը պահանջել է, որպեսզի ռուսերեն ելույթները թարգմանվեն: Նա նշել է, որ ռուսերեն հաղորդակցվելու խնդիր չունի, սակայն պետք է հիշել, որ Հայաստանում պետական լեզուն հայերենն է: Քոքոբելյանը ելույթ է ունեցել հայերեն:
«Ես հարգանքով եմ վերաբերվում ինչպես ռուսաց լեզվին, այնպես էլ ՀԱՊԿ անդամ այլ երկրների լեզուներին, բայց Հայաստանում պետական լեզուն հայերենն է: Ես պահանջեցի, որ նիստում ինձ ներկայացված փաստաթղթերը լինեն հայերեն, ինչպես նաև պահանջեցի թարգմանչի ներկայություն»,- լրագրողների հետ զրույցում ասել է Քոքոբելյանը: Նրա խոսքով՝ քանի որ նիստն ընթանում է Հայաստանի խորհրդարանում, կազմակերպիչները պարտավոր են թարգմանություն ապահովել:
Էմմա Պալյան
