Հայաստանը ինտերնետի ազատությամբ աշխարհում զբաղեցրել է 8֊րդ հորիզոնականը՝ այդ տեղը կիսելով Ֆրանսիայի հետ։ Մենք այս տարվա ամենամեծ առաջընթաց գրանցած երկրներից ենք։ Եվ սա այն դեպքում, երբ հին Հայաստանի գաղջ ուրվականը, անցյալի իր ժանգոտած քարոզչական խողովակներով փորձում է աշխարհին մոլորեցնել, թե մենք թևակոխել ենք բռնապետության էպոխա։ Սա այն դեպքում, երբ բթամիտ ֆեյքերի քաղցած ոհմակները դես ու դեն են վխտում՝ հոշոտելու պատրաստ ցանկացած մեկին. միայն թե հրաման լինի։ Սա այն դեպքում, երբ լրատվամիջոցի անվան տակ թաքնված պրոպագանդայի բութ գործիքներով ամեն օր հարվածում են մեր հասարակության գիտակցությանը՝ փորձելով հավասարակշռությունից հանել մեզ ու ծնկի բերել… Բայց սա է ազատության գինը, որքան էլ որ այն տհաճ լինի։ 50 տարի առաջ մարդու առաջնային խնդիրը ինֆորմացիա փնտրելն ու գտնելն էր, հիմա՝ մարդու համար մեկ անելիքը ինֆորմացիայի անծայրածիր օվկիանոսում ճիշտ տեղեկությունը աղբից զտելն է։ Եվ հենց այստեղ է ամենամեծ մարտահրավերը։ Եթե տեղեկատվությունը փակ է և անհասանելի, դու գիտես, որ քեզանից թաքցնում են, դու գիտես՝ ինչ կարող ես անել և ինչ չես կարող։ Բայց երբ քեզ հրամցնում են ճշմարտության քողի տակ թաքնված սուտը, որն առաջին հայացքից այնքան հաճելի ու արժանահավատ է թվում, այդժամ դու չգիտես, թե ինչ անել, անգամ չգիտես՝ ինչ չանել։
Ազատություն և գիտելիք. ահա այն երկու արժեքները, որոնց համադրությունը լինելու է մեր առաջընթացի գրավականը։ Ազատությունը առանց գիտելիքի դեգրադացնում է, գիտելիքը առանց ազատության՝ ստրկացնում։ Այս երկուսի ճիշտ համադրությունն է, որ ամրացնելու է մեր պետության առագաստը՝ օգնելով մեզ նավարկել հնարավորությունների օվկիանոսում, որը լի է շուրջբոլորը դեգերող ծովահեններով։
