Նման ճանապարհով Ադրբեջանը պարզապես փորձում է ցույց է տալ, որ պատրաստ է ամեն կերպ վերադառնալու իր նախկին քաղաքականությանը, այսինքն, մերժելու բանակցությունները եւ փորձելու ցույց տալ, որ հակամարտությունը դեռ լուծված չէ: Araratnews.am-ի հետ զրույցում ասում է ռազմական փորձագետ Հրանտ Մելիք-Շահնազարյանը` անդրադառնալով երեկ Տավուշի մարզի սահմանամերձ գյուղերի ուղղությամբ շուրջ 1 ժամ ադրբեջանական կողմից հնչած կրակոցներին:
«Այս քաղաքականությունը Ադրբեջանը իրականացնում է Թուրքիայի հետ համաձայնեցնելով: Այսինքն, Թուրքիայի հետ հարաբերությունները եւ հայ-ադրբեջանական հարաբերությունները փողկապակցված են, եւ հենց որեւէ լարվածություն է նկատվում հայ-թուրքական հարբերություններում Ադրբեջանը իր կողմից փորձում է աջակցություն ցուցաբերել»,-ասում է Հրանտ Մելիք-Շահնազարյանը:
Նա կարծում է, որ Մինսկի խմբի համանախագահները վաղուց պետք է գիտակցած լինեին, որ նման ագրեսիան ոչ միայն ուղղված է Հայաստանի Հանրապետության դեմ, այլեւ ուղղված է միջնորդների դեմ:
«Որովհետեւ վերջին հաշվով լարվածություն բերելով, Ադրբեջանի իշխանությունները ջուրն են գցում այդ բոլոր ջանքերը , որոնց վրա ժամանակ են ծախսել` քիչ թե շատ լուծելի տարբերակներ մշակելու համար: Մինսկի խումբը միշտ շարունակում է կոչերով հանդես գալ հակամարտող բոլոր կողմերին եւ չի կենտրոնանում կոնկրետ մեղավորների վրա` տվյալ դեպքում Ադրբեջանի վրա: Իսկ դա նշանակում է, որ Ադրբեջանի նման գործունեությունը շարունակական կլինի»,-ասում է Մելիք-Շահնազարյանը:
Փորձագետը հավելում է, որ Ադրբեջանի գործողությունները կանխելու եւ ավել լարվածությունից խուսափելու համար Մինսկի խումբը պետք է շատ ավելի հետեւողական եւ շատ ավելի հասցեական քննադատություններով հանդես գա: Եւ այս դեպքում այդ հասցեատերը պետք է լինի Ադրբեջանը:
Լիլիթ Առաքելյան
