Ամերիկացի կինոռեժիսոր Վուդի Ալենը հերքել է, որ սեռական ոտնձգություն է իրականացրել իր խորթ դստեր նկատմամբ, երբ նա փոքր է եղել։ «Միսթեր Ալենը կարդացել է հրապարակումը և այն որակել է որպես սուտ և ամոթալի։ Մանրամասն քննությունը ցույց է տվել ոտնձգությունը հաստատող փաստերի բացակայությունը, ինչպես նաև այն, որ Դիլան Ֆերոուն (խորթ դուստրը — խմբ․) չի կարողանում տարբերել մտացածինն ու իրականությունը», — ասվում է Ալենի հայտարարության մեջ։ Այս մասին հաղորդում է CNN-ը։
Դիլան Ֆերոուն նախօրեին այդ ոտնձգության մասին պատմել էր The New York Times թերթին։ Ֆերոուն պնդում է, որ Ալենը փորձել է իր հետ սեռական հարաբերությունների մեջ մտնել, երբ նա յոթ տարեկան էր։ Նրա խորթ դուստրը նշում է, որ ինքը որոշել է պատմել այս ամենի մասին, երբ իմացել է, որ Ալենը «Ոսկե գլոբուս» է ստացել կինոարտադրության ոլորտում ունեցած զգալի ներդրման համար։
Տեղեկացնենք նաև, որ Դիլան Ֆերոուի բողոքները հետաքննվել են ոստիկանության կողմից, սակայն այդ պնդումներն ապացուցող փաստեր չեն հայտնաբերվել։
