Հոլանդական Corendon Airlines ավիաընկերության ղեկավարը, որը հովանավորում է Նիդերլանդների չմշկավազորդների թիմին Սոչիի օլիմպիական խաղերի ժամանակ, երեկ հայտնվել է տհաճ պատմության մեջ: Նիդերլանդական De Telegraaf-ը հաղորդում է, որ գիշերը նրան ձերբակալել են նախագահ Վլադիմիր Պուտինի նստավայրի ցանկապատի վրա միզելու համար:
Սակայն նա այս քայլը չի կատարել չարամտորեն, և նույնիսկ չի իմացել, որ միզում է այդքան «բարձրակարգ» շինության պատին: Ատիլայ Ուսլուն ասել է, որ ինքը տոնել է Նիդերլանդները ներկայացնող չմշկավազորդների հաղթանակները (նրանք արդեն նվաճել են 3 ոսկե մեդալ) հոլանդական Heineken կենտրոնում, այնուհետեւ ցանկացել է շաուրմա ուտել և սկսել է այն փնտրել քաղաքում:
Մի քանի լիտր գարեջուր խմած Ուսլուն բնական պահանջները հոգալու համար հանրային զուգարան չի գտել և միզել է ուղղակի Պուտինի նստավայրի պատի տակ:
Նրան անմիջապես ձերբակալել են պահակախմբի անդամները եւ մեկ ժամ հետո՝ ազատ արձակել, սակայն ըստ Ուսլուի, իր գրպանից կորել է հազար եվրո:
