Հատկապես գարնանը Հայաստանից մեծ թվով միգրանտներ են գնում Ռուսաստանի Դաշնություն աշխատելու նպատակով: Ռուսաստանի միգրացիոն նոր օրենսդրությունը բավականին մեծ իրարանցում է առաջացրել հասարակության շրջանում: Հայաստանի հազարավոր քաղաքացիներ մեկնում էին ՌԴ աշխատելու՝ չլինելով այդ ընկերություններում գրանցված աշխատակիցներ, իսկ հիմա փոխվել է իրավիճակը. անհնար է այդ կերպ 90 օրից ավելի մնալ Ռուսաստանի Դաշնությունում: Մի կողմից սա դրական քայլ է, քանի որ օրինական աշխատելով Ռուսաստանում՝ միգրանտներն ավելի ապահովագրված կլինեն և իրենց իրավունքների խախտման դեպքում կարող են դատական կարգով վերականգնել իրենց իրավունքները:
Ռուսաստանի Դաշնության համար սա ամենակարևոր հարցը չէ, որի համար փոփոխության է ենթարկվել օրենքը: Ռուսաստանում ապրող որոշ հայ գործարարների ունեցած տեղեկությունների համաձայն, այս օրենքն իրականում դագանակ է Ռուսատանի ձեռքին այն երկրների համար, որոնք չեն մտնելու Մաքսային միություն: Ռուսաստանի Դաշնությունը մեծ աշխատաշուկա ունի, և հարևան երկրներից միլիոնավոր միգրանտներ են գալիս այստեղ աշխատելու համար։ Հիմա, երբ խստացվել է օրենքը, Մաքսային միությանը չմիացած ՌԴ հարևան երկրները մեծ խնդրի առաջ են կանգնելու։ Նրանք ստիպված են ընտրություն կատարել. կամ իրենց հարյուր հազարավոր քաղաքացիներին պետք է ապահովեն աշխատանքով, կամ մտնեն մաքսային «տանիքի» տակ և շարունակեն ապրել «խաղաղ»: Մաքսային միության անդամ երկրների քաղաքացիների նկատմամբ Ռուսաստանի միգրացիոն նոր օրենքը չի կիրառվի նույն խստությամբ:
