Կաթոլիկ Սուրբ Վալենտինի տոնը, ի տարբերություն Սուրբ Սարգսի, շարժական չէ, այն նշվում է փետրվարի 14-ին: Այս տարի, սակայն, Սբ. Սարգիսը համընկնում է Վալենտինի օրվա հետ: Սարգսի տոնը նշելու ենք փետրվարի 14-ի, երեկոյան ժամը 17:00-ից:
Բոլորս էլ քաջատեղյակ ենք, որ հայ երիտասարդները ավելի շատ նախապատվությունը տալիս են Վալենտինի տոնին: Եվ ամեն տարի հետաքրքիր, գուցե մի փոքր արտասովոր ձեւով են նշում այն:
NEWS.am STYLE-ը տոնին ընդառաջ զրուցեց երգչուհի Հասմիկ Կարապետյանի հետ: Նա նշեց, որ դեմ չէ, որ երիտասարդները նշում են Սուրբ Վալենտինի տոնը, բայց, այնուամենայնիվ, ինքը նախապատվությունը տալիս է Հայ առաքելական եկեղեցու Սբ. Սարգսի տոնին:
«Մենք պետք է նշենք Սուրբ Սարգիսը, սակայն չեմ քննադատում այն երիտասարդներին, ովքեր նշում են Վալենտինը: Երկուսն էլ սիրո տոներ են, կարելի է նշել»,- ասաց երգչուհին:
Սիրո մասին բազում երգեր են երգվել, բանաստեղծություններ ու նովելներ գրվել: Յուրաքանչյուրի մոտ սերը յուրահատուկ ձեւով է դրսեւորվում: Հասմիկի համար սերն ազատությունն է. «Սերն ինձ համար կյանքի գույներն են: Սերն ազատություն է եւ զգացմունքների թագուհի: Սերն է, որ ստիպում է ապրել»:
Ինչպես գիտենք, Հայաստանում Սուրբ Սարգսի տոնին նախորդող գիշերը երիտասարդները աղի բլիթ են ուտում` ապագա փեսացուին կամ հարսնացուին երազում տեսնելու հավատով: Երգչուհի Հասմիկ Կարապետյանն անցած տարիներին փորձել է ուտել, բայց երազ չի տեսել:
«Կարծում եմ՝ այդ հազվադեպ է լինում»,- նշեց Հասմիկը:
Յուրաքանչյուր սիրահար զույգ ցանկանում է հետաքրքիր եւ յուրահատուկ ձեւով նշել այդ տոնը:
«Դեռ չգիտեմ, թե ես եւ ընտրյալս ինչպես կնշենք սիրո տոնն այս տարի եւ որտեղ, բայց վստահ կարող եմ ասել, որ ինձ անակնկալ է սպասվում, ինչպես միշտ եւ, իհարկե, ես էլ իմ սիրելիին կմատուցեմ մի շատ հետաքրքիր անակնկալ: Դեռ չեմ որոշել, թե ինչ անակնկալ եմ մատուցելու: Գուցե այդ լինի ոչ իրեղեն՝ ինչ-որ հետաքրքիր ժամանցի ձեւ: Բայց ես շատ եմ սիրում օծանելիք նվիրել եւ ստանալ: Այդ, իմ կարծիքով, շատ ինտիմ է, երբ դու շատ լավ գիտես, թե ընտրյալդ ինչ է նախընտրում»,- ասաց երգչուհին:
Մանրամասները style.news.am — ում:
