14 տարի Հայաստան-Եվրամիություն միջխորհրդարանական համագործակցության հանձնաժողովը շատ արդյունավետ աշխատել է, եւ մենք այսօր ստացանք տեղեկատվություն, որ նիստը Ստրասբուրգում տապալվել է եւ 14 տարվա մեջ առաջին անգամ հանձնաժողովը չի ընդունել համատեղ հայտարարություն:
Այսօր այս մասին Ազգային Ժողովում լրագրողների հետ ճեպազրույցում ասաց ԲՀԿ խմբակցության պատգամավոր Նաիրա Զոհրաբյանը:
«Մենք բոլորս էլ պիտի հասկանանք, որ դա կարելի էր կանխատեսել սեպտեմբերի 3-ի որոշումից հետո: Եվրոպական կողմը արդեն շատ ավելի կոշտ պիտի լինի իր գնահատականներում: Միակ երկիրը, որ իր հետ եվրոպական պառլամենտը տարիներ շարունակ չէր ունենում համատեղ նիստերից հետո համատեղ դեկլարացիա, դա Ադրբեջանն էր: Իսկ Հայաստանի հետ մենք ունեցել ենք նախկինում շատ արդյունավետ նիստեր եւ մեր հռչակագրերը մշտապես եղել են խիստ հայանպաստ»,-ասաց Զոհրաբյանը:
Որպես հանձնաժողովի նախկին համանախագահ նա նշեց, որ Հայաստանը ունեցավ հանձնաժողովի նիստˋ զրոյական արդյունքով:
