Կանադան որպես օգնություն 15 մլն դոլար է տրամադրելու Սիրիայում քիմիական զենքի ոչնչացման կազմակերպմանը։ Այս մասին հայտարարությամբ հանդես է եկել Կանադայի վարչապետ Սթիվեն Հարփերը Հորդանանի տարածքում գտնվող սիրիացի փախստականների Զաատար ճամբար կատարած այցելության ժամանակ։
Հարփերը նշել է, որ Կանադայի կառավարությունը դաշնակիցների հետ միասին ջանք չի խնայելու քիմիական զենքի բոլոր պաշարները ոչնչացնելու համար։
Վերոնշյալ գումարից 10 մլն դոլարը հատկացվելու է ՄԱԿ-ի Քիմիական զենքի արգելման կազմակերպությանը, իսկ մնացած 5 միլիոնը՝ ԱՄՆ-ի պաշտպանության նախարարությանը, որը տրամադրել է «Քեյփ Ռեյ» հատուկ տեխնիկան, որի վրա էլ նախատեսվում է ոչնչացնել 500 տոննայի հասնող քիմիական վտանգավոր նյութերը։
