Իշխանություններն ադեկվատ չեն. Ռուբեն Մեհրաբյան

ԵԿՄ համագումարում Սերժ Սարգսյանի հնչեցրած մտքերի, ինչպես նաև այլ ներքաղաքական հարցերի շուրջ Araratnews-ը զրուցեց փորձագետ Ռուբեն Մեհրաբյանի հետ:

-Ինչպե՞ս կմեկնաբանեք Սերժ Սարգսյանի ելույթը ԵԿՄ համագումարում , հատկապես դրսից մեզ պարտք տալու մասին ասածները:

-Գիտեք ինչ, ես շատ կուզեի հավատալ, սակայն իմ կարծիքով, ինչպես նաև համոզմամբ, Հայաստանը վերջին շրջանում նույնիսկ իր սուվերենությունն է կորցնում, համենայն դեպս իշխանությունների վերջին քայլերը բերում են դրան:

-Իսկ ի՞նչ կասեք այն մասին, որ Սերժ Սարգսյանն անիմաստ համարեց ՀայՌուսգազարդի 20%-ի պահպանումը:

-Այն քաղաքականությունը, որը տարվել է մինչ այդ 20%-ը հանձնելը, դա այն քաղաքականությունն էր, որն անհնարին դարձրեց այդ 20%-ի պահպանումը: Այստեղ քաղաքական պատասխանատվության հարց կա. ո՞վ դա արեց, ինչպե՞ս ստացվեց, այդ ի՞նչ պարտք էր, որ գոյացավ , ինչո՞ւ գոյացավ:Սրանք այն հարցերն են, որ թե՛ քաղաքական ուժերը, թե՛ քաղաքացիական հանրությունը պետք է անընդհատ տան: Թե չէ արդարացնել, որ հնարավոր չէր պահել, շատ ներողություն, իսկ իրենք ինչի համար են էնտեղ, նրանք դրա համար են, որ անհնարինը սարքեն հնարավոր, այլ ոչ թե դարձնեն անհնարին՝ հետո արդարանան:

-ԲՀԿ վերջին համագումարը հնարավո՞ր է նոր քաղաքական գործընթացների սկիզբ հանդիսանա:

-Ես այդպես չեմ կարծում՝ շատ լավ հասկանալով այն հյուսվածքը, որից բաղկացած է ԲՀԿ-ն:

-Ի՞նչ հյուսվածքի մասին է խոսքը:

-ԲՀԿ-ն դա փաստորեն մեկ օլիգարխի կուսակցություն է, և մենք լավ գիտենք թե Հայաստանում բիզնեսն իշխանությունների հետ ինչպես է սերտաճած, այնպես որ հռետորաբանությունը գործողությունների հետ չպետք է շփոթել: Իհարկե, նրանք էլ ունեն իրենց հետևորդները, և քանի որ իշխանությունները դադարել են ադեկվատ լինել , այս ընդդիմախոսի խոսքն ուղղակի փորձ է համահունչ լինել հասարակության պահանջներին:

-Կլինի արդո՞ք գարունը քաղաքականապես թեժ:

-Ինչ որ առումով,այո գարունը թեժ կլինի, քանի որ ժողովրդի դժգոհությունը հասել է գագաթնակետին, իսկ իշխանության ոչ ադեկվատությունըˋ ցցուն: Ես կարծում եմ, որ հասարակական որոշակի ընդվզում չի կարող ուղղակի չլինել:

Արմեն Մկրտչյան