Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը երկուշաբթի օրը բավարարեց հրապարակախոս Արգիշտի Կիվիրյանի դիմումը: Դատարանը վերացրեց Հատուկ քննչական ծառայության քննիչի որոշումը, որի հիմքով քրեական հետապնդում չի իրականացվել Կիվիրյանի նկատմամբ բռնություն գործադրած ոստիկանների դեմ:
Արգիշտի Կիվիրյանը բողոքարկել էր անցած տարվա օգոստոսի 1-ին Երևանի քաղաքապետարանի մոտից իրեն բերման ենթարկելիս ոստիկանների կիրառած բռնությունների համար քրեական հետապնդում չիրականացնելու որոշումը:
Հրապարակախոսը այդ օրը փորձել էր վրան տեղադրել ոստիկանության հնչեցրած արգելքների պահին: «Ոստիկանության ցանկացած պահանջ՝ չտեղադրել վրան, դա ապօրինություն է: Այնպես որ, սկսում ենք վրանի տեղադրումը, անցանք գործի»․ — Կիվիրյանի այս կոչից րոպեներ անց ոստիկանները չեն փորձել անգամ իրենց իմացած օրենքների շրջանակում հիմնավորել վրան տեղադրելու արգելքը, նրանք ուժի կիրառմամբ հրապարակախոսին նստեցրել են մեքենան և բերման ենթարկել Կենտրոնականի բաժին՝ քաղաքացիների բուռն արձագանքների ուղեկցությամբ:
Կան ապացույցներ, որ Կիվիրյանը ոստիկանության բաժնում մնացել է ավելի քան երեք ժամ: Այս գործին կցված է դատաբժշկի եզրակացություն, ըստ որի՝ Արգիշտի Կիվիրյանի մարմնի վրա հայտնաբերվել են բռնության հետքեր:
Այս ամենով հանդերձ, սակայն, սեպտեմբերի 28-ին Հատուկ քննչական ծառայության քննիչ Լյովա Մելքոնյանը մերժել էր Կիվիրյանի դիմումը՝ քրեական գործ չհարուցելով նրա նկատմամբ բռնություն գործադրած ոստիկանների նկատմամբ: Հրապարակախոսը այդ որոշումը բողոքարկել էր վերահսկող դատախազին, սակայն Հայաստանի գլխավոր դատախազության ավագ դատախազ Հարություն Հարությունյանը հոկտեմբերի 17-ին մերժել էր դիմումը, Կիվիրյանն էլ դիմել էր դատարան:
Դատարանի այսօրվա որոշումը ստանալուց հետո կողմերը կարող են այն բողոքարկել տասնօրյա ժամկետում:
«Ազատություն» ռադիոկայանի հարցին՝ կբողոքարկի՞ արդյոք դատարանի որոշումը, Հատուկ քննչական ծառայության քննիչ Լյովա Մելքոնյանը արձագանքեց․ — «Դատախազն է բողոքարկելու, չեմ կարող ասել»: Քննիչը ձեռնպահ մնաց նաև դատողություններ անելուց այն կապակցությամբ, թե արդա՞ր է համարում արդյոք դատարանի որոշումը:
«Իմ կարծիքով, տեսանյութները ոչ մի հակառակ բան ցույց չեն տվել իմ գրած որոշման հետ կապված», — օգոստոսի 1-ին տեղի ունեցածը փաստողտեսանյութերի վերաբերյալ լրագրողներից մեկի հարցին արձագանքեց Մելքոնյանը՝ ի պատասխան «Ազատության» մեկ այլ հարցի ասելով, որ իր համար դատարանի այսպիսի որոշումը անսպասելի էր:
Նա դժվարացավ նաև ասել՝ հնարավո՞ր է արդյոք, որ նորից քննելու դեպքում կարճի քրեական գործը:
Արգիշտի Կիվիրյանը, մինչդեռ, դատարանի որոշումը պայմանավորեց տեսագրությունների առկայությամբ:
Մանրամասները azatutyun.am — ում:
