Իրանի նկատմամբ կիրառվող պատժամիջոցները նպաստում են, որպեսզի Թեհրանը կատարի «վեցյակի» հետ բանակցությունների արդյունքում ստանձնած պարտավորվածությունները։ Այսպիսի հայտարարությամբ է հանդես եկել ԱՄՆ ֆինանսների փոխնախարար Դևիդ Քոենը։
«Մենք շարունակում ենք լայնամասշտաբ պատժամիջոցներ կիրառել։ Պատճառը պարզ է. մենք գիտենք, որ լուրջ պատժամիջոցները կօգնեն ընդհանուր գործողությունների ծրագրին և որոշիչ դեր են խաղալու առաջիկա բանակցություններում», — Քոենի խոսքերն է մեջբերում «Ինտերֆաքսը»։
Փոխնախարարը հավելել է, որ եթե Թեհրանը չկատարի ստանձնած պարտավորվածությունները, Վաշինգտոնը կուժեղացնի իր պատժամիջոցները։
Հիշեցնենք, որ 2013 թվականի նոյեմբերի 24-ին Ժնևի հանդիպմանը Իրանը և միջազգային միջնորդների «վեցյակը» (Ռուսաստան, ԱՄՆ, Մեծ Բրիտանիա, Ֆրանսիա, Չինաստան և Գերմանիա) համաձայնության էին եկել Իրանի միջուկային ծրագիրը կրճատելու միջոցների վերաբերյալ:։
