Հունվար ամսվա սկզբին, դեռ տոները չավարտած, հասարկությունը շոկի մեջ ընկավ, երբ եկավ սպառած գազի գումարը վճարելու ժամանակը: Քաղաքացիները դժգոհում էին, որ այս անգամ անհամեմատ ավելի են վճարել գազի սպառման համար, սակայն չեն կարողացել տանը տաք ջերմաստիճան պահովել: Գյուղերում շատերը հրաժարվել են գազով տունը տաքացնելուց և անցել են ավանդական վառարաններին: Մենք փորձեցինք ճշտել, թե որքան են վճարել անցյալ ամիս Ազգային Ժողովի պատգամավորները: ԱԺ ՀՀԿ խմբակցության անդամ Կարինե Աճեմյանն օրինակ վճարել էր 39 000 դրամ, բայց անցյալ տարվա համեմատ գումարը ավել է կազմելˋ կապված եղանակային պայմանների հետ. «Ես վճարել եմ 39 000 դրամ, սակայն տունը, որը ջեռուցվել է փոքր է և պատերն էլ հաստ են: Անցյալ տարվա համեմատ գումարը մի փոքր ավել է կազմելˋ ցուրտ եղանակի հետ կապված»,-ասաց տիկին Աճեմյանը:
Ազգային Ժողովի պատգամավոր, ԲՀԿ-ական պատգամավոր Վահան Բաբայանը ևս դժգոհ է գազի գներից և համոզված է, որ այս տարի ավել են վճարել սպառած գազի դիմաց: Դեկտեմբերի համար պատգամավորը վճարել է 79 000 դրամ. «Այս տարվա գազի վճարը իհարկե տարբերվում էր: Ես վճարել եմ 79 000 դրամ»,-ասաց պարոն Բաբայանը:
Իսկ հասարակությանը խնայողության կոչ անող ՀՀԿ-ական Գալուստ Գրիգորիչը ոչ մի կերպ չէր պատասխանում մեր զանգերին։ Ամենայն հավանականությամբ, նա հետևում է սեփական խորհրդին և խնայում է հեռախոսի մարտկոցն ու քաղաքացիների նյարդերը:
