Ավտոերթի գնալուց առաջ մենք գիտեինք, որ մեր առաջ ճանապարհն արդեն իսկ փակել էին: Այս մասին այսօր լրագրողների հետ հանդիպմանը նշեց «Հիմնադիր խորհրդարանի» քարտուղարության համակարգող, Շուշիի առանձնակի գումարտակի հրամանատար Ժիրայր Սեֆիլյանը:
«Մինչև ավտոերթը Արցախում սկսել էին մեր մասին ապատեղեկատվություն տարածել, թե մենք Արցախ ենք գնում հեղաշրջում կատարելու, դիրքերից հավաքելու հայ զինվորներին և բերելու Հայաստան: Ընդ որումˋ նման ապատեղեկատվություն էր տարածվում օրեր, անգամ շաբաթներ շարունակ»,-նկատեց բանախոսը:
Վերջինս ընդգծեց, որ մինչև Բերձոր հասնելը ինքն արդեն գիտեր, որ ճանապարհները փակ են, բայց գնացել և փորձել է պարզել, թե ինչու են ճանապարհները փակ, մինչդեռ ոչ ոք այդպես էլ չի կարողացել սպառիչ պատասխան տալ այս հարցին:
«Երբ ես հասկացա, թե ինչ է տեղի ունենալու, հրահանգեցի որպեսզի ավտոերթի մասնակիցները շրջվեն ու հետ գնան, բայց մինչև մենք կհասցնեինք հետ գնալ նրանք հարձակվեցին մեզ վրա: Ինձ հետևից հարվածեցին: Եթե անգամ ես դուրս չգայի ավտոմեքենայից, վստահ եմ, որ այս հարձակումը տեղի էր ունենալու: Բարեբախտաբար, զոհեր չեղան և մենք հնարավորինս քիչ վնասներով դուրս եկանք վիճակից»,-նշեց նա:
Անդրադառնալով ավտոերթի առաջնային նպատակինˋ բանախոսը նկատեց, որ իրենք ամենևին էլ վատ նպատակներով չէինք գնում Արցախ, այլ գնում էինք, քանի որ իրավիճակը խիստ օրհասական է: Ավտոերթի առաջնային նպատակն, ըստ Սեֆիլյանի, արցախցիներին իրենց մտահոգությանը մասնակից դարձնելն էր , որն է՝ Հայաստանիˋ ԵՏՄ մուտք գործելուց հետո Արցախի՝ անորոշ վիճակում հայտնվելը:
Վարդուհի Ստեփանյան
