Եվրոպայի համար փախստականների ճգնաժամում շրջադարձային պահ է սկսվել Թուրքիայի հետ համաձայնությունից հետո, որն օգնել է էականորեն կրճատել փախստականների հոսքը, Եվրոպական հանձնաժողովի նախագահ Ժան Կլոդ Յունկերի խոսքն է փոխանցում Ռիա Նովոստին:
«Մենք կանգնած ենք վճռական պահի առջև: Թուրքիայի հետ համաձայնությունը ցույց է տալիս իր կենսունակությունը, փախստականների թիվն էականորեն նվազում է»,- նշել է Յունկերը:
Եվրահանձնաժողովի նախագահը միաժամանակ նշել է, որ որևէ արգելափակոց և պատ բավարար չի լինի կանգնեցնելու Մերձավոր Արևելքից մարդկանց փախուստը դեպի Եվրոպա, քանի դեռ շարունակվում են պատերազմն ու բռնությունները:
Հիշեցնենք, որ Թուրքիայի տարածքից փախստականների հոսքը Եվրոպա դադարեցնելու դիմաց Անկարան Եվրամիությունից ստացել է վիզային ռեժիմի ազատականացման, ԵՄ-ին անդամակցության բանակցությունները վերսկսելու և 3 միլիարդ եվրոյի խոստում:
Թուրքիան պարտավորվել է ընդունել և կատարել մի շարք ոլորտներում եվրոպական նորմերը: Յունկերը շեշտել է, որ եթե Թուրքիան չկատարի պարտավորությունները, ապա Եվրամիությունը կարող է չեղարկել վիզային ռեժիմի ազատականացումը:
