Եվրամիությունն ապրում է իր պատմության բախտորոշ պահերից մեկը, և սեպտեմբերի 16-ին Բրատիսլավայում ԵՄ պետությունների առաջնորդների առաջիկա հանդիպումը պետք է ի ցույց դնի Միության պատրաստակամությունը` հաղթահարելու ԵՄ կազմից Մեծ Բրիտանիայի դուրս գալու որոշումից հետո ի հայտ եկած իրենց թուլությունները` հայտարարել է Գերմանիայի կանցլեր Անգելա Մերկելը Փարիզի Ելիսեյան պալատում Ֆրանսիայի նախագահ Ֆրանսուա Օլանդի հետ ունեցած բանակցությունների արդյունքներով:
«Եվրոպան այժմ գտնվում է բախտորոշ փուլում: Ի վերջո, միայն գործերը կարող են համոզել քաղաքացիներին»,- ասել է Մերկելը:
Իսկ Ֆրանսիայի նախագահ Ֆրանսուա Օլանդը հավելել է. «Մենք ձգտում ենք Բրատիսլավայի գագաթնաժողովը Եվրոպայի համար օգտակար դարձնել: Մենք պետք է եվրոպացիներին հստակ ուրվագծենք նրանց ապագան»:
Ընդ որում, նախագահն ընդգծել է, որ առաջիկա տարիներին ԵՄ-ի զարգացման առաջնահերթություններից մեկը պետք է լինի մայրցամաքում անվտանգության ապահովումը, և այդ հարցը կդառնա Սլովակիայի մայրաքաղաքում անցկացվելիք հանդիպման կենտրոնական թեմաներից մեկը:
