Ազգային Ժողովում շարունակվում է «Օսմանյան Թուրքիայի կողմից 1915-23թթ-ին իրականացրած հուների ու ասորիների ցեղասպանության դատապարտության մասին ՀՀ ԱԺ հայտարարության նախագիծն» ընդունելու հարցի քննարկումը: Հիմնական զեկուցող Էդուարդ Շարմազանովին Ժառանգություն խմբակցության պատգամավոր Զարուհի Փոշտանջյանը հարցրեց, թե ինչու ժամանակին Ժառանգություն կուսակցության նույն նախագիծը մերժվեց ԱԺ-ում: «Պետք է անկեղծ լինեք ու ասեք, որ Ձեր մեջ խիղճն արթնացավ այս նախագիծը սկսելուց առաջ: Բայց, որպես պատմաբան, Ձեր խիղճը ե՞րբ կարթնանա, որ եզդիների հետ թուրքերի կատարածը որակավորեք որպես ցեղասպանություն»:
Էդուարդ Շարմազանովը պատասխանեց, որ Ազգային Ժողովը զգացմունքներ արտահայտելու վայր չի, և ամեն մարդ ունի սեփական խիղճը: «Խնդրում եմ իմ փոխարեն մի որոշեք՝ եզդիների ցեղասպանության հետ կապված փաստեր կա՞ն, թե՞ ոչ: Ես, որպես պատմաբան, կարող եմ ասել միայն, որ դեռևս որևէ փաստի չեմ տիրապետում: Ինչպես նաև չեմ ճանաչում Հայաստանում որևէ պատմաբանի, որը կարողանա փաստեր ունենալ ու բերել, թե եզդիների ցեղասպանություն է իրականացվել: Ինչպես նաև կոչ եմ անում Ձեզ՝ չկուսակցականացնել այս հարցերը, քանի որ այս նախագծի մեջ իրենց բաժինն ունեն բոլոր 6 խմբակցությունները: Ես շնորհակալություն հայտնեցի ԱԺ-ի 6 խմբակցություններին, եթե Դուք Ձեզ չեք համարում այդ խմբակցություններից մեկը՝ դա Ձեր խնդիրն է»:
Զարուհի Փոստանջյանի արձագանքին, որ ժամանակին Ժառագություն կուսակցության բարձրացրած նույն նախագիծի համար ստացած պատասխանը անբավարար էր, Էդուարդ Շարմազանովը պատասխանեց, որ իմաստ չի գտնում վիճելը: «Մենք խոսում ենք լրիվ այլ նախագծերի վերաբերյալ: Ունեք նախագիծ՝ բերեք ներկայացրեք: Ես հասկանում եմ, որ կրկնությունը գիտության մայրն է, բայց չեմ կարող անվերջ կրկնել, որպեսզի Դուք ըմբռնեք»:
