Մայիսի 15-ին «Դրական մարդկանց հայկական ցանց» սոցիալական ՀԿ-ն ՁԻԱՀ-ի կանխարգելման հանրապետական կենտրոնի հետ համատեղ Հյուսիսային պողոտայում անցկացրել է միջոցառում` նվիրված ՁԻԱՀ-ից մահացածների հիշատակի միջազգային օրվան:
ՀԿ-ն հայտնում է, որ միջոցառման նպատակը հասարակության լայն շերտերին ՄԻԱՎ-ի վերաբերյալ հետազոտության կարևորության մասին տեղեկացումն ու ՄԻԱՎ-ի վերաբերյալ հետազոտություն անցնելու խրախուսումն էր, նաև հետազոտության հետ կապված հասարակության մեջ առկա կարծրատիպերի փոփոխումը:
Անցորդներին հնարավորություն է տրվել անցնելու ՄԻԱՎ-ի վերաբերյալ անվճար և անանուն հետազոտություն արագ թեստավորման մեթոդով և ընդամենը 15-20 րոպեի ընթացքում ստանալու հետազոտության պատասխանը: Հետազոտվել ցանկացողներին տրամադրվել է խորհրդատվություն: ՄԻԱՎ-ի վերաբերյալ հետազոտությունն ու խորհրդատվությունն իրականացրել են ՁԻԱՀ-ի կանխարգելման հանրապետական կենտրոնի մասնագետները Ռուսաստանի Դաշնության կողմից Հայաստանին նվիրաբերված շարժական կլինիկայում: Ընդհանուր առմամբ, ՄԻԱՎ-ի վերաբերյալ հետազոտվել է 90 մարդ:
Անցորդներին բաժանվել են ՄԻԱՎ-ով ապրող մարդկանց ձեռքով պատրաստված մոմեր: Միջոցառումն ավարտվել է մոմավառությամբ. խորհրդանշական «Քվիլթի» վրա վառվել են մոմեր:«Քվիլթը» կարված է եղել «514» թվի տեսքով՝ խորհրդանշելով Հայաստանում ՄԻԱՎ/ՁԻԱՀ-ով հիվանդների մահվան դեպքերի թիվը:
