Երևանում մեկնարկել է Հայաստանի ազգային օլիմպիական կոմիտեի և Հայաստանի բասկետբոլի ֆեդերացիայի համատեղ ուժերով կազմակերպած բասկետբոլի մարզչական սեմինարը, որը վարում է սլովենացի փորձառու մասնագետ Տոնե Կրումպը, հաղորդում է ՀԱՕԿ պաշտոնական կայքը:
Սեմինարի առաջին օրը Կրումպը ծանոթացավ հայ մարզիչների հետ, լսեց նրանց մեկնաբանությունները և տվեց մի շարք հանձնարարություններ: Սլովենիայից ժամանած հյուրն ընդգծեց, որ վերջին տարիներին հայկական բասկետբոլում դրական տեղաշարժեր է նկատել:
«Ես շատ քիչ բան գիտեի Հայաստանի մասին, բայց նախքան այստեղ գալն ուսումնասիրեցի ձեր երկիրը և նկատեցի, որ բասկետբոլում աստիճանաբար ակտիվանում եք, մասնակցում եք Եվրոպայի տարբեր տարիքային առաջնությունների»,-ասել է Կրումպը:
Նախատեսված էր, որ սեմինարին մասնակցելու է 30 մասնագետ, սակայն ցանկացողների թիվը զգալիորեն մեծ էր, ուստի Կրումպի հետ աշխատելու հնարավորություն ստացավ 40 մարզիչ:
Փետրվարի 16-ից Տոնե Կրումպը մարզիչների հետ գործնական դասընթացներ կանցկացնի նաև «Միկա» մարզադահլիճում:
Դասընթացներն ավարտվելու են փետրվարի 20-ին:
