Երևանում օրեցօր պակասում են երգեցիկ թռչունները՝ իրենց տեղը զիջելով կաչաղակներին, ագռավներին և ճնճղուկներին: Թե ինչո՞ւ են մայրաքաղաքում պակասում այլ գույներ և ձայներ ունեցող թռչունները՝ Araratnews.am-ի հետ զրույցում պարզաբանեց բնապահպան Սիլվա Ադամյանը.«Երևանը հիմա դարձել է օրգանիզացված քաղաք, որտեղ ժամանակին եղած երգեցիկ թռչունների տեսակները կամաց-կամաց անցնում են մերձերևանյան տարածքներ: Երևանում կանաչ գոտիները, այգիները և ծառերը հատվում են, որը նպաստում է, որ ամբողջ քաղաքի կենսաբազմազանության կազմը փոխվի: Այդ երգեցիկ թռչուններին կարելի է տեսնել միայն այն վայրերում, որտեղ գոնե կանաչ թփուտներ կան, իսկ այդպիսի տարածքները մեզ մոտ շատ քիչ են»:
Բնապահպանի հավաստմամբ՝ երգեցիկ թռչունները պակասում են, որովհետև ավելանում են ագռավները, կաչաղակները, ճնճղուկները, որոնք, ի տարբերություն երգեցիկների, հարմարվում են ցանկացած պայմանի.«Այս թռչնատեսակները ավելացել են, որովհետև մյուս խնդիրների կողքին մենք ունենք նաև աղբահանության խնդիր: Իսկ մենք գիտենք, որ օրինակ՝ ագռավներն ու կաչաղակները սնվում են ինչպես միջատներով, այլ երգեցիկ թռչունների ձվերով, այնպես էլ աղբով: Վերջերս քաղաքում այնպիսի աղբակույտ տեսա, որի վրա թռչունների հոծ զանգված էր հավաքվել. հենց սրանով է պայմանավորված ամբողջ կենսաբազմազանության փոփոխությունը: Քաղաքում երբեմն հնարավոր չէ կանգնել ծառերի տակ, որովհետև մեծ քանակությամբ կաչաղակներ ու ագռավներ կան: Վերջերս ես նկատել եմ, որ ագռավներն ու կաչաղակները փորձում են քաղաքից դուրս մղել անգամ ճնճղուկներին»:
Սիլվա Ադամյանը վստահեցնում է, որ մեզ մոտ երգեցիկ թռչունների տեսակները պակասում են նաև այն պատճառով, որ վերանում են հին շինությունները.«Գոյություն ունի բնապահպանական ճարտարապետություն, որտեղ հաշվի են առնում քաղաքի կենսաբազմազանությունը, ուսումնասիրում են, փորձում են հասկանալ՝ ի՞նչ կարող են անել, որպեսզի օրգանիզացիայի հետ միասին կենսաբազմազանությունը պահպանվի: Օրինակ՝ այնպիսի շենքեր են կառուցում, որտեղ հատուկ անցքեր կլինեն թռչունների համար: Մեզ մոտ դա չկա, և երբ տարեցտարի հին շինությունները վերանում են՝ մենք ունենում ենք լուրջ խնդիր»:
Բնապահպանի կարծիքով՝ խնդիրը լուրջ է, իսկ քաղաքապետարանի աշխատակիցները հարցին լուրջ չեն վերաբերվում.«Այս ամենը հասցնել քաղաքապետարանի աշխատողներին՝ շատ դժվար է: Չեն հասկանում հարցի լրջությունը ու չեն ուզում ընդունել: Շատ ծանր է իրենց այդ ամենը բացատրելը: Երկրի քաղաքային քաղաքականությունը տանում է նրան, որ խնդիրը չի լուծվի»:
