ԵԱՀԿ անդամ երկրների ներկայացուցիչներն այսօր երեկոյան արտակարգ նիստ կանցկացնեն՝ քննարկելու Ուկրաինայում տիրող իրավիճակը: TASS-ի փոխանցմամբ՝ այս մասին հայտարարել է ԵԱՀԿ մշտադիտարկման հատուկ հանձնաժողովի ներկայացուցիչ Մայքլ Բոչուրկիվը:
«Այսօր 16:30-ին (Երևանի ժամանակով՝ 19:30-ին) Վիեննայում ազգային պատվիրակությունները Ուկրաինայի հարցով արտակարգ պլենար նիստ կանցկացնեն», — ասվում է Բոչուրկիվի թվիթերյան միկրոբլոգի միջոցով տարածված հայտարարության մեջ:
Սպասվում է, որ նիստին մասնակցելու են ԵԱՀԿ դիտորդական առաքելության ղեկավար Էրթուղրուլ Ափաքանը և եռակողմ շփման խմբում ԵԱՀԿ մշտական ներկայացուցիչ Հայդի Թալյավինին:
Նիստի օրակարգում հունվարի 9-ից հետո ուկրաինացիների և ռուսամետ ուժերի սահմանային գոտում լարվածության աճի հարցն է:
