ՀՀ Սահմանադրական դատարանը օրեր առաջ քննել է 2014 թվականի հոկտեմբերի 10-ին Մինսկում ստորագրված՝ «Հայաստանի Հանրապետության՝ «Եվրասիական տնտեսական միության մասին» 2014 թվականի մայիսի 29-ի պայմանագրին միանալու մասին» պայմանագրում ամրագրված պարտավորությունների՝ ՀՀ Սահմանադրությանը համապատասխանելու հարցը: Նույն օրը դատարանի առջև կազմակերպվել էր բողոքի ակցիա, որի ընթացքում ոստիկանների և ցուցարարների միջև միջադեպ է տեղի ունեցել:
Միջադեպի հանգամանքները պարզելու նպատակով ոստիկանության Երևան քաղաքի վարչության պետ Աշոտ Կարապետյանի կողմից նշանակվել էր ծառայողական քննություն:
ՀՀ ոստիկանության հասարակայնության հետ կապերի և լրատվության վարչության աշխատակից Արմեն Մալխասյանը Araratnews.am-ին հայտնեց, որ ծառայողական քննությունն ավարտվել է:
Երևան քաղաքի վարչության նշանակված ծառայողական քննության արդյունքներով` նույն վարչության հասարակական կարգի ապահովման բաժնի պետի տեղակալ, ոստիկանության փոխգնդապետ Արա Սարգսյանը ստացել է նկատողություն:
