Araratnews.am-ի խմբագրություն էր զանգահարել մի քանի որսորդ, որոնք դժգոհում էին բնապահպանության նախարարության որոշումից: Համաձայն որոշման՝ լորի որսը սահմանափակել են, լիցենզիայի գինը՝ բարձրացրել 5-15.000 դրամ դարձնելով: «Ինչպես կարող ենք շաբաթը մեկ անգամ որս անել, եթե լորը Հայաստանում մնում է մոտավորապես 25 օր, ապա թռչում Թուրքիա»,- դժգոհում էին որսորդները:
Որսորդների մյուս բողոքը վերաբերում է որսահանդակների քչությանը: Լորը լինում է հացահատիկային ցանքատարածությունում, իսկ Հայաստանում դրանք սակավ են: «Կա վտանգ, որ որսորդության օրերի սահմանափակման, ցորենի արտերի քչության պատճառով որսորդները, հավաքվելով իրար գլխի, կարող են միմյանց կրակել»,- ասաց մեզ որսորդներից մեկը:
Պարզաբանում լսելու համար զանգահարեցինք Շրջակա միջավայրի նախարարության կենսառեսուրսների կառավարման գործակալության կենդանական ռեսուրսների կառավարման բաժնի պետ Սեւակ Բալոյանին: Նա ասաց, որ որսորդության օրերն են չորեքշաբթի, շաբաթ, կիրակի, այսինքն՝ որոշել են 3, ոչ թե 1 օր եւ տոնական ոչ աշխատանքային օրերին կարող են որսորդությամբ զբաղվել: «Այս որոշմանը հանգել ենք նախարարությունում բազմաթիվ քննարկումներից հետո: Իսկ որսի թույլտվության գումարը դարձել է ոչ թե 15.000, այլ 17040 դրամ: Գումարը վճարում են սիրողական որսի սեզոնային կտրոնների համար, որոնցով կարող են որսալ մի քանի կենդանատեսակ՝ աղավնի, լոր, քարակաքավ, ջրլօղ թռչուններ: Այդ գումարը ձեւավորվել է կենդանիների բնօգտագործման վճարից, որը սահմանել է հարկային օրենսգրքի 208 հոդվածը: Այսինքն՝ որսորդության թույլտվության վճարի բարձրացման մասին խոսք չկա»,- մանրամասնեց պաշտոնյան:
Սեւակ Բալոյանը հիշեցրեց՝ նախկինում որսորդության թույլտվության վճարն այլ սկզբունքով էր ձեւավորվել՝ եղել է միջինացված գումար (որսորդը քանի անգամ է որսի գնում), որը բնօգտագործման վճարը չի ներառել:
Պաշտոնյան կարծում է, որ ցանկացած կենդանու գինը շատ բարձր պետք է լինի, քան նախատեսված է հիմա: «Դա իմ կարծիքն է: Նախկինում, երբ վճարում էին որսի կտրոնի համար 8000 դրամ, դա իր մեջ չէր ներառում կաքավ տեսակը: Դրա համար էլ առանձին 8000 դրամնէին վճարում: Իսկ հիմա 17040 դրամ վճարում են, ձեռք բերում կտրոն, որն իր մեջ ներառում է սահմանված թռչնատեսակները»,- տեղեկացրեց նախարարության աշխատակիցը:
Իսկ լորի որսի սիրահարների համար նախարարությունը սահմանել է առանձին կտրոն 6000 դրամով:
Ինչ վերաբերում է որսորդության հստակ օրեր սահմանելուն, որսահանդակների քչությանը, պաշտոնյան համաձայն է որսորդների այս դժգոհությանը: Բայց հիշեցնում է՝ սա փոխզիջումային որոշում է: «Տեսչական մարմինը, ոստիկանությունը չունեն մարդկային բավարար ռեսուրս, որ շաբաթվա 7 օրն էլ վերահսկողություն իրականացնեն, ընտրվեցին շաբաթ եւ կիրակի օրերը, որ մյուս օրերին ցանկացած կրակոց համարվի ապօրինի որսորդություն: Չորեքաշթբի օրն էլ ընտրվել է որսորդների, որսորդմիությունների հետ քննարկումից հետո: Մենք գիտակցում ենք, որ նեղություն ենք տալիս, սահմանափակումներ ենք մտցնում, բայց այս տարի այսպես որոշվեց՝ հաշվի առնելով որսի եւ որսորդության մասին օրենքի բացը, տեսչական մարմնի հնարավորությունը,: Որսահանդակների սահմանների ճշգրտման խնդիր եւս կա: Հուսանք՝ մինչեւ եկող տարվա որսաշրջանի բացումը այդ հարցն էլ լուծված կլինի»,- ավարտեց իր խոսքը Շրջակա միջավայրի նախարարության կենսառեսուրսների կառավարման գործակալության կենդանական ռեսուրսների կառավարման բաժնի պետ Սեւակ Բալոյանը:
Հիշեցնենք, որ այս տարվա որսաշրջանը սկսվում է օգոստոսի 24-ին եւ վերջանում 2020 թ-ի փետրվարի 29-ին: Որսի թույլտվության համար որսորդները պետք է դիմեն որսորդական միություններին, որոնց հետ նախարարությունը պայմանագիր է կնքում: Դրանց հիման վրա էլ կտրոն է ձեւավորում եւ բաժանվում որսորդներին:
Սոնա Դավթյան
