Այսօր՝ մարտի 4-ին, ողբերգական ավտովթար է տեղի ունեցել Տավուշի մարզում: Ժամը 09:40-ի սահմաններում Վազ 2121 մակնիշի 36 ՕԼ 750 համարանիշի ավտոմեքենայի վարորդը Այգեհովիտ-Պառավաքար-Այգեպար Հանրապետական նշանակության 36 ճանապարհահատվածի 8-րդ կմ-ում դուրս է եկել ճանապարհի երթևեկելի գոտուց և մոտ 100 մետր գլորվելով՝ հայտնվել ձորում: Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի մահացել է, 4 հոգի ծայրահեղ ծանր վիճակում տեղափոխվել են Իջևանի հիվանդանոց: Վթարի վայր են ժամանել Ճանապարհային ոստիկանության 2-րդ սպայական գումարտակի 4-րդ վաշտի 2-րդ դասակի աշխատակիցները՝ վաշտի հրամանատար Սերգեյ Հակոբյանի և դասակի հրամանատար Սերյոժա Ղալթաղչյանի գլխավորությամբ: Ժամանել են նաև Իջևանի հրշեջ-փրկարարական ջոկատը՝ 1 մարտական հաշվարկով: Վթարի մասին ՃՈ օպերատիվ կառավարման կենտրոնից տեղեկությունը փոխանցել են Հայաստանի քննչական կոմիտեի Տավուշի մարզային քննչական վարչություն, որտեղից դեպքի վայր են ժամանում քննիչները: Փաստի առթիվ մարզի քննչական վարչության պետ Աննա Մանթաշյանի կարգադրությամբ Իջևանի քննչական բաժնում հատկապես կարևոր գործերով քննիչ Վասիլ Սարգսյանի կողմից հարուցվել է քրեական գործ՝ ՀՀ քր.օր-ի 242 հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) հատկանիշներով: Ժամանել է նաև ոստիկանության Իջևանի բաժնի օպերատիվ խումբը՝ բաժնի պետ Կարեն Հակոբյանի գլխավորությամբ: Ոստիկանությունն ու քննչական բաժինը պարզել են՝ վարորդը եղել է Լոռու մարզի Դեբեդ գյուղի բնակիչ, 54-ամյա Սեյրան Նազլուխանյանը, մահացածը նրա համագյուղացի՝ 44-ամյա Արմեն Նազլուխանյանն է, վիրավորներն են՝ համագյուղացիներ՝ 14-ամյա Վահե Նազլուխանյանը, 18-ամյա Աստղիկ Նազլուխանյանը և 37-ամյա Քրիստինե Խարազյանը:
Մանրամասները՝ shamshyan.com -ում:
