Արդեն 3-րդ օրն է, որ տարբեր բուհերի ուսանողները շարունակում են դասադուլն ընդդեմ տարկետման իրավունքի վերացման: Երեկ ուսանողները հանդիպել են ԿԳ նախարար Լեւոն Մկրտչյանի հետ, սակայն ընդհանուր հայտարարի չեն եկել: Ի՞նչ է մտածում այս մասին ԵՊՀ ռեկտոր Արամ Սիմոնյանը. պարզեց Araratnews.am-ը:
Պարո՛ն Սիմոնյան, ի՞նչ կարծիք ունեք ուսանողների բողոքի ակցիայի եւ դասադուլի մասին: Չի բացառվում՝ դասադուլը տեւական ժամանակ շարունակվի:
Մի քիչ համբերե՛ք, ռեկտորատի կարծիքը մի քանի ժամից պարզ կլինի:
Ըստ Ձեզ՝ այս դասադուլն արդյունք կտա՞, ուսանողներն իրենց նպատակին կհասնե՞ն:
Ես կարծում եմ՝ ուսանողների այդ պահանջն արդարացի չէ:
Կարծիք կա, որ բողոքն ուղղորդված է: Համամի՞տ եք:
Այո՛:
Ո՞ւմ կողմից:
«Ելքից» մարդիկ կան էստեղ (հավանաբար, նկատի ունի ԱԺ «Ելք» դաշինքի պատգամավոր Արարատ Միրզոյանի օգնական Վահան Կոստանյանին.-հեղ.): Հստակ երեւում է, որ ուղղորդված է, եւ դասադուլը շահարկվում է քաղաքական նպատակներով:
Բայց լուրեր կան, որ այս բողոքը նաև վարչապետ Կարեն Կարապետյանի կողմից էլ է հրահրված:
Ես այդպիսի բաներից տեղյակ չեմ: Ուղղակի գիտեմ, որ այսպես կոչված լիբերալներից մեկը «Ելքից» է (նկատի ունի «Ելք» դաշինքի պատգամավոր Արարատ Միրզոյանին), մյուսը՝ նրա օգնականը:
Դուք համարում եք, որ երկու մարդ կարող է ամբողջ ուսանողությանն ուղղորդե՞լ:
Ամբողջ ուսանողությանն իր հետեւից ոչ ոք չի կարող տանել: Ընդամենը 120-150 ուսանող է տարբեր բուհերից: Մեծամասնությունը ԵՊՀ-ից է:
Չե՞ք կարծում, որ սա ներիշխանական պայքար է…
Չէ՛, այդպես չեմ կարծում: Մնացած բոլոր խնդիրներով դիմեք մեր լրատվականին:
ԱԱԾ-ը ձեզ ու ԵՊՀ-ի դեկանների հետ ի՞նչ է խոսել այս ակցիայի մասին: Տեղեկություներ կան, որ…
Ամենայն պատասխանատվությամբ հայտարարում եմ՝ ԱԱԾ-ից ոչ մեկը ինձ հետ ոչինչ չի խոսել: Դրանք ստահոդ լուրեր են:
Հավանակա՞ն է, որ ուսանողների այս ակցիան վերածվի ներքաղաքական գործընթացի:
Հուսամ՝ այդպիսի բաներ չեն լինի, չնայած մարդիկ կան, որ ուզում են այդպես լինի:
Սոնա Դավթյան
